2025ǁî kurib !nâ i ge nēsis kōse, ǂauna !gôab aorekhoega autotsūke!gân xa ra !aromahe ǁōgu tsî ǂgâudi !nâ a !â, tarekhoedi ǀkha i ra ǀgoweǀnōhe o, tis ge Auton Tsūke!gân ǂGaesa (MVA) ǂoa ge wekheb di Wunstaxtsēs ai ge mî. “Surigu ai ra dīhe !gôagu ge ra ǁgau, aorekhoesib !nāsase autoǂgâugudi hîa ǁōgu kse ra sī di !nâ a !âsa. Nēsis kōse i ge nē kurib ǀguib !nâ 47 aorekhoegu tsî 19 khoedi tsîna ǁōhâ,” tis ge MVAs di Dana Sîisas, Rosalia Martins-Hausikusa ǁnāpas ge ūhâ i ǂhôamāui-i !nâ ge mî.!Nāsa autotsūke!gân hîa ǁōgu tamas ka i o tsû-aina Namibiab a ǂhabase ge !aroman ge sao ra ǀkharigu !nâ a !nurisa, ǂgaiǀons ai ǀKhomas, Omusatib, Zambezib, Ohangwenab, Oshanab, Oshikotob tsî Kavangob Aiǂoas tsîna. ǀKhomas tsî Ohangwenab tsîn ge ǁîb hoan xa a ǀgapi !gôab ǀnū!gû-aon hîa autotsūke!gân xa !aromahe hâse hâ ǁōgu dina !nuri hâ, mâb hoab 11 ǁōga ūhâse. MVAs di !gôagu ge 22%gu di ǂharosa ǀnū!gû-aon ǀkha a !gaeǁaresa ǁōgu !nâ ra ǁgau, tsî nau ǀkhāb ai 402 auton tsūke!gâna. Martins-Hausikus ge ǀhûhâsigu ǁanina !hūb a ǂhabase ra ǂgan, in ǂâisa daob ai ūhâ tsî ǂōrisasib ǀkha daoga !gâu, hoaǀkhā i a !norasa !khaisa ǁawoǁawotoa hâse. “Sida ge hoa Namibiaǁîna ra ǂgan, !nari-aona xu ǀnū!gû-aon kōse, in daoba sîsenūs !nâ ǁîn di !âsa ǀhuru tsî nē ǁkhaehe ǁkhā a autotsūke!gân tsî ǁōga ǀamǀam. ǁKhāti da ge ǀhûhâsigu khoen ai ǂgansa ra dī, in tsūke!gâna !naua!noexaseMVA ǂGaes tsūke!gân di !nuris !gôas 9682 tawa ǂanǂan,” tis ge ǁîsa gere ǀaro. Ai!âs ge dana sîsenǂuira mâisasa a mîs ge, ǀgūǁaes nî nē ǂgaesa ǀhûhâsiga daob ǁgaragu tsî nî hâ ǂhâbasa ǁgau!nâsa mās, !gōsase ǀnū!gû-aona daoga !norasase !gâus di ǂhanusi ǁkhowa-amsa ūhâsa. MVA ǂgaes ge hoana !khōǂgā hâ ǀgauba ǁîs di ǁkhāǁkhākhâidi !nâ ra sîsenū tsî ǂâisa dīǀgaugu, ǁgau!nâs, ǁawoǁawos tsî ǁanǂgāsabena !â kais ai ra ǂnûi. –Nampa
Daogu tsūke!gân ge !nāsa aorekhoega !gamhâ tarekhoedi xa: MVAs
