OMHEDI – Omupresidente Netumbo Nandi-Ndaitwah okwa kumaida oshiwana opo shi longele kumwe nopolifi okukandeka oimbuluma unene tuu ominyonena tadi longelwa ounona.

“Natu kwashilipalekeni kutya ounona ove li meameno,” ta ti.

Edi Nandi-Ndaitwah okwe di popya Olomakaya pefimbo loshivilo shomaongo osho neudo shadanenwa kouhamba kOmhedi moshitukulwa shaHangwena.

Neudo oshivilo shomaongo osha danenwa koshi yoshipalanyole “Okukaleka po efimano lomifyuululwakalo detu noukumwe.”

Ovaleli vopapolitika, ovaleli vopamifyuululwakalo, oshiwana mwa kwatelwa ovanyasha nounona novaleli veengeleka okwa li va holoka momwaalu muhapu koshivilo shomaongo.

Oshivilo shomaongo oha shi danwa omudo keshe komalelo opamifyuululwakalo monooli no shi li sha fimana.

Nandi-Ndaitwah okwa yelifa ta ti osha fimana ngeenge oshiwana shi na ekwatafano liwa nopolifi molwashi otashi kwafele okukondjifa oimbuluma womidingonoko.

Omupresidente okwa kumaida natango ovaleli vopamifyuululwakalo opo navo va dane onghandangala yokukelela omahepeko omomaumbo taa ningilwa ounona novakainhu.

Okwa li ta popi elikwatela koshikumungu osho sha ningwa kOkahandja neudo omo ounona vavali voukadona ve li tuwa va dipawa momilamba.

“Omalelo opamifyuululwakalo  naa kale e na ekwatafano liwa nopolifi shaashi otashi kwafele okulopota omahepeko omomaumbo.

Omupresidente okwa ti Ovanamibia nava kale ve na oukumwe nelongelokumwe lokukala tava lopota oimbuluma ngeenge tai ningwa.

fhamalwa@nepc.com.na