WINDHOEK– Mbunga politika zaDTA, kazilipakerere kumwe novasingi notaxi mokurwanesa mfuto ezi vaturapo zina kara asi kwazeruka unene. Nokutanta asi mfuto zokuzeruka ezi zina kara noudigu komaparu gawo. DTA kahundilire epangero lyopokatji asi liwapukurure nonzira ntani kugwedako dimwe, ntani asi opo vana kugwedako ngoso vahepa nye kutura momagano vasingi wonotaxi. Ketameko tupu lyomvhura zezi, mbunga zoNamibia Transport and Taxi Union (NTTU), kwageve runyegenyo rwawo kombongarero zanavenye omu varwanesere mfuto zokuzeruka ezi vana kumona awo asi kuna kara evatuko veta. Union simpe kwatente asi epiro lyomavango vatura asi gonotaxi mokusikamekera ndi mokurondekera kuna kara simwe sina kuninkisa yirugana yawo yikare tayidigopa, morwa awo kuvaninkisa varondekere nkenye evango vana kumona nampili kapi lina wapa.
Vatulisipo noveta vahepa kuhageka mukaro ogu gokutekura vanataxi ngwendi vanayirongo mosirongo sawo. Vasingi kurugana nawa moomu yawapera kuruganesa nzira, yipo nye asi nsene kunakara mfuto yiwo hena wokuheperamo morwa awo kuruganesa nzira nkenye siruwo. Twahepa kuturapo malisigo pokatji kovaruganesi nzira ntani vanataxi ava vakara asi eparu lyawo kwakara tupu moomo monzira yimo ava gwana nzambi zawo. Awo kwatura eparu nalinye monzira yipo asi mfuto zokuzeruka tazivali. Yimo ana kutanta kamutjangikurona gombunga zaDTA, Vincent Kanyetu. Nokutanta asi mbunga zendi kuna kukwatesako ehundiro lyoUnion, nye nawo si kavahundilire vaTaxi asi kapisi varuganese epuko nonzira asi morwa veta.
Vahepa kudiva asi vatulisipo noveta kapi ngavaturapo veta zina kara asi zovanaTaxi velike,nye veta zahepa kukara zanavenye. Vana veta kwakarerapo vaNamibia navenye,yipo asi vahepa kutara eyi vana kusivana vasingi wonotaxi. Hamutjangantoni simpe kahundilire vaUnion ava asi kapisi kukara nomukara gokuninkiliramo vanaveta asi nampo vatjire kutulisapo noveta. Nye vahepa kuhingira pamwe yipo vatare asi udigu kuugusapo ngapi, nasihuguvara ngano ngavagwana ehagero lyoudigu ou,udigu ou una kara asi kuna tamba varuganesi notaxi edi dakara asi mayovi govantu kuvatwara koyirugana ntani kukavareta pokutumbuka nkenye ezuva. Komitiye zakarapo zombongarero zaNavenye,kuhamena ediveta nonoveta kwatulisapo magano asi Ndango zodoropa zaWindhoek noMinistry zoyirugana nougendero vahepa kutura egano twaromo lyononzira donodoropa. Mbunga zovasingi notaxi kwakara tavalyaterer yikando yoyinzi kutunda tupu mvura zina puko omu vana kugava kupira kuzuvhira mbili mfuto ezi vatulisapo nsene vana kukwata asi kuna rugana epuko siruwo oso ove kunakusinga.