Ovanafikola kosekundofikola Oshela Secondary School ova pewa oikwafifohongo mw akwatelwa omambo kehangano loRossing Foundation i li pongushu yoshimaliwa sheeN$295 000. MEtitano, ovanafikola ova pewa omambo 1 415 kofikola yavo mOkongo. Okwa didilikwa ehangano eli hali yambidida eefikola dihapu moikwafifohongo unene tuu eefikola di li momhumbwe.
Moshipopiwa shaye kansela woshikandjohoololo shaKongo Efraim Shipindo okwa ti osha fimana ngeenge ovanafikola tava pewa oikwafifohongo opo va dule okulihonga noupu nokupita noidjemo iwa kexulilo lomudo. “Ovanafikola ovo ovaleli vokomongula notava ka ninga ovanashilonga va yooloka, onghee osha fimana opo ounona va mone omhito yokuya kofikola,” ta ti.
Okwa twa ovanafkola omukumo opo ve lihonge nondjungu, okufimaneka ovahongifikola vavo noshoyo oku likaleka kokule nokulonga oimbuluma nokunwa omalodu.
Omunambelewa a dja kehangano loRossing Foundation, Lysias Uusiku okwa ti ehangano otali lalakanene okushakeneke epangelo ondjilakati unene tuu oshikondo shehongo.
Uusiku okwa ti ehangano lavo ola didilika eefikola da taalela omashongo oikwafifohongo onghee naashi osha eta opo va yambidide eefikola. Onghee okwa ti otava twikile nokuyambidida eefikola noikwafifohongo.