Hilma Hashange

Oshilyo shokeumbo lomutumba wopashiwana Willem Amutenya osha yambidida ovanafikola nomapando eenghaku 30 kofikola Kandume Combined, i li moshitukulwa shaShikoto mOmaandaxa.

Kansela woshikandjohoololo shaMuthiya Erastus Nekomba oye a kwafela okutofa mo ovanafikola ovo va pumbwa omakwafo omudjalofikola ndele ta shivifile Amutenya.

Amutenya okwa li omuhongifikola mukulu pofikola Kandume Combined School. Okwa kalela po ongudu yoSwapo keumbo lomutumba wopashiwana, a ya ko omudo 2025.

Okwa didilikwa ovanafikola vahapu komikunda tava dengwa koluhepo eshi va taalela omhumbwe oikwafifohongo.

Amutenya okwa ti naye okwa fikola momukunda kofikola Iihongo Combined omo naye a didilika kutya ovanafikola ova taalela omashongo ngaashi okuya kofikola inava djala eenghaku. Okwa ti okuudite etumba okukala ta yambidida ovanafikola komikunda shaashi ovanafikola ova pumbwa okuyambididwa.

“Onda hafa okuyambidida ovanafikola pofikola opa kwa li handi longele nale. Ovanafikola ova pumbwa okutuwa omukumo tashi pitile mokuyambidwa,” ta ti.

Amutenya okwa ti ngeenge omunafikola ota yambididwa noikwafifohongo otashi mu tu omukumo e lihonge nondjungu.

“Ovanafikola ovo ovaleli vokomongula. Otava ka ninga ovanashilonga vomaifano a yooloka,” ta ti. Amutenya okwa twa ovanafikola omukumo ve lihonge nelitulemo nokukala va fimaneka ovahongi vavo.

Omukulunhufikola pofikola Kandume Combined, Emma Angula okwa pandula Amutenya eshi a yambidida ovanafikola shaashi eenghuku odo a yandja otadi ka eta olunduluko liwa kovanafikola.

Okwa popya ta ti ovataalela omashongo eepate hadi talama omeva osho yo pefimbo lokwenye hava kala ve na omeva ina wanena ovanafikola.

“Pefimbo lokwenye ohatu shiki oshinano sheekilomita 17 okukateka omeva keepomba,” ta ti.