Omunashipundi gwokakomisi komahogololo, Electoral Commission of Namibia (ECN), Elsie Nghikembua, okwa kumagidha Aanamibia ya ishangithe uukalata womahogololo muulethimbo ya pewa oshoka ethimbo lyokwiishangitha itali ka lelepekwa nando.
ECN okwa tameke nomayishangitho gakwalukehe mOmaandaha, notaga ka tsikila sigo 01 Aguste 2024. Shika otashi ka ningwa sho taku longekidhwa omaholololo gopaupresidente naangoka gomutumba gwopashigwana, ngoka taga ka kala ko momasiku 27 November nuumvo. Nghikembua okwa li a indile aantu ayehe ya gwana okuhogolola ya ka ishangithe. Omahala gomaishangitho otaga kala nokupatuluka mOmaandaha sigo omOluyomakaya.
“Katu na ompito yokulelepeka ethimbo lyomaishangitho, otu na ashike omasiku 52. Ngele otwa lelepeke okwiishangitha, nena otu na okuya po nesiku lyi ili lyomahogololo, oshoka esiku tatu ka nyanyangidha omusholondondo gwaahogololi, konima yomasiku 90 otu na okuninga omahogololo,” ta ti ngaaka.
Nghikembua okwa ti okakomisi komahogololo oke na omahala gokwiishangitha miitopolwa ayihe 14, noga gwana opo Aanamibia ayehe ya adha okuhogolola ya kuthe ombinga.
“Onda hala oku mu tsa omukumo opo kaamu tegelele sigo okomunute gwahugunina. Pethimbo ndika omikweyo kadhi shi oonde nope na ethimbo lya gwana okwiishangitha, ta fatulula ngaaka.
ECN oku na omahala ge li 4 297 miikandjohogololo ayihe yi li 121. Aanamibia ayehe ye li mepipi lyokuhogololo oya pumbwa okakalata okape, oshoka hoka ke li po ngashiingeyi itaka longithwa we.
Nghikembua okwa dhenge omuthindo kutya opo wu ishangithe owa pumbwa okugandja okamutse koshilongo, opasporta nenge omukanda gwokuhinga. “Ashike oshoka otatu ka ishangitha wo omahogololo gopaitopolwa nomalelo goondoolopa, nena owu na wo okukala wu na ombaapila yomafutilo gaMuni. Ngele kayi po nena owu na okuudhitha ofooloma opo wu gane kutya owa kala pehala mpoka ho zi uule woomwedhi dha adha po12,” ta gandja uuyelele wothaathaa mboka.
Nghikembua okwa li wo a opi kutya ECN ota ka ninga omayishangitho ga gwedhwa po omumvo tagu ya. Omayishangitho ngaka otaga ka kwathela oohandimwe mboka ya tembuka okuza koshikandjohogololo shimwe yay a kushikwawo, naamboka taya ka gwanitha ooomvula 18.
-Nampa