Omunambelewawiliki ta longele kouministeli wehongo, omaungomba, ovanyasha nomaudano Mbumba Haitengela okwa kunghilila oshiwana opo shi xulife po okulongulula eedjapo davo doulongelwe nelalakano lokupewa oilonga. 

Momukandapitifi wa pita Etivali Haitengela okwa koleka ta ti ouministeli wavo owa didilika ovanhu hava kongo oilonga needjapo doipupulu. 

“Osha nyika oshiponga ngeenge omunhu ta kongo oilonga nodjapo yoipupulu shaashi otashi eta omunhu a kwatwepo ndele ta pewa eedula modolongo ile a futifwe oshimaliwa shonhumba,” ta ti. 

Okwa ti unene tuu ovanhu vamwe ohava etapo odjapo yoipupulu oyo tai ulike kutya omunhu okwe li honga koshiputudilo shopombada nelalakano lokumona oilonga. 

Haitengela okwa ovanyasha ovo va dopa ondodo onhi-12 ohava ka longulula eedjapo davo ndele tava tula po oitwa yopombada yoipupulu kutya ova pita nawa. 

Omudo wa djako omukainhu weedula 31 Mwetufa okwa pewa ehandukilo leedula 13 modolongo komhangulilo yaHangwena. 

Omukainhu ou okwa kwatwa po omudo 2021. 

Okwa monika ondjo eshi a kengelela a kala ta longo ofikola nodjapo yoipupulu, eshi a vaka oshimaliwa mombelewa yomukulunhu fikola sheeN$6500 noshoyo onghendabala yedipao, omo kwa li a twa nombele omuhongifikola pamwe naye. 

Mwatufa okwa li ta longele kofikola i li koshitukulwa shaHangwena ofikola Limbadungila Combined School okudja omudo 2019 fiyo 2021. 

Ota ku hokololwa kutya omukainhu ou okwa uudifa oilonga nodjapo yoHonours Degree yaUNAM ta ti kutya oku na ouhongelwe wokulonga eedondo dopetameko ashike mboli oipupulu kena sha shi li odja po yokulonga ofikola. 

Kouyelele wa dja keembelewa dehongo vati Mwetufa okwa futwa kepangelo oshimaliwa shi fike peeN$620 000 okudja omudo 2019 fiyo 2 0 2 1 moule wefimbo olo kwa li ta longo ofikola nodjapo yoipupulu. 

Natango omudo 2023 wa djako omulumenhu umwe okwalopotwa eshi audifa oilonga mopolifi nodjapo yondodo onhi-12 ya tulwa oidjemo yoipupulu. 

Ouyelele ou owa kamonika eshi ovadeulwapolifi ve li pokumana omadeulo ndele eedjapo davo tadi ka talululwa. 

Omulumenhu ou okwa okwatwa po, ye ina twikila vali nomadeulo. 

Haitengela okwa kumaida ovambelewa ovo tava longo koshikondo shoku kuta mepangelo oshoyo komahangano opaumwene opo va kwashipaleke kutya otava tale nawa eedjapo shaashi dimwe oda longululwa. 

Okwa yelifa ta ti omunhu ngeenge ta pewa odjapo okudilila keembelewa da kula domakonakono ohai kala shangwa eenomola odo hadi dulu okudengelwa mokompiuta. 

“Ngeenge eenomola oda dengelwa mokompiuta ohadi ulike edina lamwene wodjapo, edalo laye oshoyo oidjemo yaye. 

Onghee eshi ohashi kwafele opo idjemo yoipupulu ya tulwa podjapo i kale ya monika,” ta ti. 

fhamalwa@nepc.com.na