Taimi Haihambo
Manga etango ina lipita moshilando pangelo, omunamido 60 Saveria Hifindwako oku li nale peumbo laye poKuryangava atema ediko lomundilo, nombiya yoomadi tai fuluka ina oukuki, aningila ava hava kalonga ongula vapitulepo oukuki vongula manga vapyu.
Shima ava havai koilonga vamane okupitula oukuki, Hifindwako ohai koLafrenz aka dike okatala kaye yee aka twikile ngeshefa yaye youkuki nokapana.
“Nonande vahapu vatalangeko onga omulandifi ashike wokapa noukuki, elalakano lange okutwifa eendjodi dounona vange vahamano ava ndaeta kombada yedu.
Momukalo ou omo akala a xupu opamwe nouna vaye. Oimaliwa youkuki oyo yeva fikolifa aveshe fiyo tavai koiputudilo ndele tava mane omalihongo avo.
Ngeenge tashiya pongeshefa, Hifindwako vati okuna ohamu nombili oyo hainane eecustoma puye.
“ Nande omunhu nakale aendelela ndele tapopifange ashike, ohamu yokoshipala shange nelaka lombili olo ashike hali munane ndele teli landelemo okakuki kaye nombelela,” ta ti.
Nonande aishe yafa tai ende nawa, Hifindwako oha kala ataalela omashongo efiku nefiku ngaashi eenghalo donhepo dayooloka, omutenya, odula oshoyo outalala adule okutula omboloto poshitaafula. OKwa ti natango omashongo akwao ongaashi oilandifomwa yaye yefiku inai pwamo, oinima yaninga ondilo ile ovanhu ina valanda nawa efiku olo. Ashike okwa holola kutya ei hayo hai mutula pedu, shaashi omafiku iha elife.
Hifindwako okwa ti yee okuli omutwe weumbo lavo koushimba oshoyo kowambo, nokuna ovanhu vahapu komapepe aye teva file oshisho.
“ Mokulonga kwange noudiini ondina oshinakuwaifa shokudjaleka ovanhu, okuvapa valye oshoyo oku futila omalihingo avo, oo ame ina ndimona omhito oku awanifilwapo kovakulunhu vange,” ta ti.
Okwa twa ovadali vakwo omukumo vadje momutumba ndele tava kanyangela ovana. “Ngeenge ota shipula ulokwe kodula, ufye omutenya ile outalala molwa eenghalamwenyo dounona veni ningeni ashike shaashi kapena shikukutu shihaxulu. Oilonga yoye noudiinini onai kekukufeko ngaho fikulimwe,” ta ti.
“Inamukula yoo muna omaludalo alambalala omapandavanda taa kongo omakwafo manga ovadali vafya ounye wokunyangela ovana,” ta twikile.
Hifindwako mongeshefa omu vati okwa waiminamo modula 1986 nokwa wanifilaoneedula 39 paife.