Auleria Wakudumo
Eefikola moshitukulwa shaShana oda ninga eenhele doimbuluma tai ningwa kovahongwa, osho sha eta ovahongi, ovanashilonga vamwe peefikola, noshi yo ovanafikola voovena va mbadapale.
Moule womafiku atano, oshitukulwa shaShana osha kundana oiningwanima i fike pu itano, ya ningwa kovahongwa okudja keefikola da yooloka noibofa ihamano oya lopotwa kopolifi fiyo opapa.
Oiningwanima oya kwatela mo ovahongwa va hangika noingangamifi mofikola, omuhongwa a twa mukwao nombele, va denga mukwao, a hangika noinima tai feekelwa ya vakwa naumwe a xupa okudengwa kovakwashiwana shaashi ta nyeke ovanhu eengodi.
Meenghundafana naKundana, Omukulunhuwiliki mouministeli wehongo Sanet Steenkamp okwati ovadali ovo ovahongi votete okulonga ounona vavo omikalo, okudja keumbo manga ina veya kofikola.
“Ngeenge ohatu popi oshili, ovadali itava dulu okutula oinakuwanifwa yovahongwa aishe komapepe ovahongi ndele tava pe vali ovahongi ombedi ngeenge ovahongwa tave li umbata nai omanga voo itava dana onghadangala melongo lomikalo lounona vavo,” Steenkamp ta ti.
Steenkamp okwa ti omuhongwa ngeenge okwa pangulilwa oshimbuluma, ouministeli wehongo vati ihau yandje eetundi modolongo.
Ashike nande ongaho, ouministeli wehongo vati ohau pitike ovahongwa vomondodo 11 no AS (12) opo va shange omakonaakono ngeenge ovadali ova lopota oshinima osho kofikola.
“Ovahongi voLife Skills ovena owino okukwafela ovahongwa tava lumbu nomikalo da yooloka ashike nande ongaho ovadali inava teelela ashike ovahongi. Inatu hala okukanifa ovahongwa vetu koingangaamifi ashike ofikola onhele yelihongo nokulongwa nongeenge opena umwe womovahongwa a hala okupiyaneka ehongo lavakjwao, oveta oina okulonga oilonga yayo,” Steenkamp ta ti.
Steenkamp okwa weda po ta ti keshe oshitukulwa oshina omuxungimwenyo, ovaxungimwenyo va topolelwa oikandjo taku wedwa ovahongi voLife Skilss peefikola.
Epangwe
Oimbuluma ya kula ya lopotwa kovahongwa petameko lodula fiyo 26 Septemba 2024 omwa kwatelwa ovahongwa va kwatwa nomapangwe omo ovahongwa vanhe okudja keefikola Gabriel Taapopo SSS, Mweshipandeka SSS, Evululuko SSS noAshiyana SSS va hangika vena omapangwe ena ongushu okudja N$100 fiyo N$1 300 ena eeglama okudja 1 fiyo 26. Ovahongwa aveshe ova djamo modolongo ashike natango oshibofa oshili momake omhangu.
Oinima ya vakwa
Oshivike sha djako, omuhongwa womoMweshipandeka SSS okwa hangwa ena eengodi nhano molukanda laNgwediva. Eengodi otadi feekelwa da vakwa vati. Omuhongwa otaka holoka momhangu.
A tuwa nombele
Oshiningwanima shi kumwifa osha ningwa mOshakati pokati kovahongwa vavali eshi omuhongwa a fikola mofikola Iipumbu a twa omuhongwa womOshakati secondele nombele ndele ta tete po ohema, ondjato nombindja yaye nombele eshi mukwao a ongotela pedu.
A dengwa
Ovahongwa okudja kofikola Ekwafo SSS mOngwediva ova ponokela omuhongwa mukwao ndele tave mu denge molwa vati oumbako vokomatwi osho sha eta nakuninga oshihakanwa a ka mone ouhaku koshipangelo kOshakati.
Oufiku wetinhe lwopo 00h00, omuhongwa ta feekelwa natango ha fikola mEkwafo okwa henuka okudengwa koshiwana eshi a nyekula omunhu ongodi. Omuhomgwa vati nande eshiivike koshiwana, okwa pondola okufiya po ovakwashiwana ovo vali tave mu taata. Oshivike shadjako mOhangwena, ovahongwa vavali ova tulwa moipandeko eshi va vaka eexuxwa 22 moshikuku shofikola.
Oibuluma tai longwa kovahongwa otai pumbwa ovakwateli po vehongo aveshe va tule oukuni kumwe opo vu finde omashongo a taalela ovahongwa vonena.
Commissioner wopolifi moshitukulwa shaShana Naftal Lungameni Sakaria okwati luhapu ngeenge opolifi tai ningi omahado keefikola, ovahongwa ohava hangwa nomapangwe oshoyo oilwifo ya honga mofikola. Sackaria okwati ovadali nava dane onghadangala mokukwashilipaleka kutya ounona vavo ovena omikalo.
“Ngeenge omuhongi ota ningilwa omatilifo ndele ta lopotele opolifi, opolifi oina okuungaunga noshibofa osho. Ovahongi itava dulu okukala mofikola va mbadapalekwa kovahongwa,” Sackaria ta ti.
Sackaria okwa kunghilila ovahongwa opo veli humbate nawa mofikola. Okwa ti yoo ovadali nava kufe ombinga melongo lomikalo mounona vavo.