Auleria Wakudumo
OSHAKATI – Epangelo laGermany ola yandja ekwafo lopashimaliwa leemiliona N$15 kouministeli womidingonoko, eefuka nomapashiono okukwafa oikunino itano yokupashukila oifitukuti. Elalakano loshimaliwa okushunifa pedu elipomomumwe lovanhu noifitukuti oshoyo okushunifa pedu omafyo ovanhu taa etwa koifitukuti.
Epangelo laGermany ola yandja ekwafo eli okupitila mounisteli wavo weliko oshoyo ombaanga yavo hai ifanwa oKfW Development.
Minista womidingonoko Indileni Daniel okwa holola kutya eenhele da pewa omakwafo aa omwa kwatelwa oKing Nehale Conservancy, oprograma yoNorth Central Lion Rangers, Uukolonkadhi-Ruacana Conservancy, Uukwaluudhi Conservancy noSheya Shuushona Conservancy.
“King Nehale okwa pewa oN$3 655 195. Oshimaliwa eshi otashi ka longifwa okutungulula eepomba nhatu. Oprograma yoNorth Central oya pewa oN$2 401 480, tai ka longifwa okudika oyuunda 12, okulanda omalamba okukaleka eenghoshi kokule eli 164, okuyandja omadewo mokuninga omapekapeko, okulihonga okuyandja omakwafo otete poshiningwanima, nokuyandja omadewo mokukwata nawa oshimaliwa,” Minista ta holola.
Minista okwa twikila ta ti eenhele dikwao ngaashi Uukolonkadhi-Ruacana Conservancy oda pewa oshimaliwa shi fike poN$1 700 000, okutungulula eepomba domeva dili nhee oshoyo okulanda eengodi dopeke dokomalungula dili mbali. Uukwaluudhi owa pewa oN$1 839 446 okutungulula navo eepomba domeva dili nhee omanga Sheya Shuushona a pewa oN$1 700 000 okumboola omboola imwe, nokulanda eelamba dokukaleka eenghoshi kokule dili 20.
Omukulunhu wombaanga yoKfW Development Nuria Stormer okwa holola kutya Germany okuundite etumba okulongela kumwe naNamibia mokukaleka po oifitukuti nokukwashilipaleka eameno lovakwashiwana.
“Otuna okukendabala okuamena ovakwashiwana unene ovo veli va ama koikunino yoifitukuti. Eshi otashi ningwa momukalo omo oifitukuti tai amenwa, itai dipawa kovakwashiwana oshoyo momukalo omo ovakwashiwana itava monifwa oshiponga koifitukuti,” Stormer ta holola ngaho.
Stormer okwa twikila okufatulula kutya eshi ngaho omwaalu wovanhu tau i pombada moshilongo, oshoyo omwaalu woifitukuti. Oifitukuti ohai li hange tai kendabala okuuya popepi novanhu tai kongo nande omeva ngaashi moNamibia hamu kala enota ile tai nyange oikulya pomapya ovanhu unene konooli yoshilongo.
Okwa ti oshimaliwa eshi sha yandjwa kepangelo laye, otashi kwafele okuxwepopaleka elipumo mumwe loifitukuti novanhu nokukwashilipaleka kutya eemwenyo dovanhu noinamwenyo yavo oda amwenwa keenghoshi, keendjaba, kookavandje nomambungu nokoifitukuti aishe.
“Onde lineekela oshimaliwa otashi ka longifwa ngaashi sha nhuninwa. Ohandi indile yo ovatonateli veenhele edi opo va kwate nawa aishe oyo tai ka tungwa opo i dule okulongifwa komapupi taeya,” Stormer ta ti.
Omunashipundi wokakomitiye koKing Nehale Conservancy Martin Elago okwa holola olupandu kepangelo laNamibia eshi tali longele kumwe nepangelo laGermany okukonga omakwafo opo va shiive okukwafwa.
Elago okwa indila yo epangelo opo li va kwafe vali noihauto yokuninga omapekapeko peenhele doifitukuti oshoyo ondjabi yovanailonga ili xwepo.