Auleria Wakudumo 

Ouministeli wounamapya nounaimuna, eeshi, omeva nomatalululo omadu Inge Zaamwani okwa holola kutya okabinete oka pitika eemiliona N$58 di longifwe okukelela omukifi wekondo nelaka moNamibia. 

Minista okwa holola ngaha pefimbo ta yandje olopota yomukifi wekondo nelaka momutumba wEumbo lOpashiwana Etivali. 

Zaamwani okwa ti muJanuali, ouministeli owa ninga omapekapeko peengaba daNoordoewer naAriamsvlei opo va dule okutula po eenhele dokupombela nokukosha eetuwa adishe tadi ya moNamibia okudja koSouth Africa. 

Zaamwani okwa holola kutya ouministeli otau twikile okukelela omukifi wekondo nelaka oo wa tukuka poishiindalongo ngaashi Botswana ndele tau tandavele fiyo omoSouth Africa. “Eshi otashi holola kutya otwa pumbwa okutula omilandu neendjidikila moilonga shaashi oshilongo osha dingililwa koilongo oyo ya tukuka omukifi oo.” Minista ta holola ngaho. Zaamwani okwa ti omilandu odi na okutulwa peenhele opo ku amenwe eliko loshilongo, ovanafaalama osho yo oshilongo shi dule natango okukala tashi landifa koilongo yokondje yoshilongo imwe. 

Minista okwa holola kutya eendjidikila tadi shikula oda tulwa peenhele okukelela omukifi ou opo uhe uye moshilongo. 

Ouministeli owa indika ombelela noinima aishe ya ndulukwa moinamwenyo yekondo okudja keenhele odo da tukuka omukifi moBotswana naSouth Africa. 

Ouministeli owa wedela yo omwaalu wovanambelewa vokoshikondo shoinamwenyo keengaba daSouth Africa naBotswana. “Ovanambelewa 23 otava ka longela keengaba, oilonga tai kalelele omanga 29 navo va tuminwa oku ka longa pakafimbo keengaba,” Minista ta holola ngaho. 

Minista okwa ti ouministeli ou na omhangela yokuwedela ko komwaalu wovanailonga ve li 28. Okwa ti eshi otashi ningwa okukwashilipaleka kutya ova kondeka omukifi wekondo nelaka okuya moshilongo. Ouministeli otau ka konakona nokutala oihauto aishe tai ya nokudja moshilongo, oshikondo shoinamwenyo otashi twikile okuyandja ehongo moshiwana kombinga yomukifi wekondo nelaka oshoyo okulongela kumwe netanga leameno ngaashi opolifi okukwafela keengaba. 

Oinamwenyo ei hai kala oihakanwa yomukifi wekondo nelaka unene ongaashi eengobe, oikombo, eedi osho yo oingulu. 

Omadidiliko opetameko e na sha nomukifi moinamwenyo oipute yomokanya osho yo komilungu, oshinamwenyo tashi di omayeye ahapu tashi lilafalafa luhapu komulungu ile tashi likweshenga komayoo. Vati natango ohai kala i na oipute komakondo ile omakondo a tenda. Oimuna ngeenge ya didilikwa vati nai likalekelwe. Ngeenge oshimuna otashi efa omayeye ahapu ile shi na oipute nokulilafa luhapu komulungu nai kale ya idililwa opo i likalekelwe. Oimuna ei i na oundjolowele nai kalekwe kokule naayi tai vele. 

Ovanafaalama ova kunghililwa yo kutya shima va mono oididiliki yoludi eli, nava ninge onghendabala opo va twale oimuna kombelewa yoshikondo shokupanga oinamwenyo. 

Ova kunghlilwa yo vaha kale mekwatafano noinamwenyo ei tai ehama, vo nava kale ve lidjaleka olutu alishe ngeenge tava i mekwatafano nayo. 

-awakudumo@nepc.com.na