Abraham Mwanyekange 

Omupresidente Netumbo Nandi- Ndaitwah okwa holola ewedelo leendjabi deeminista, oongoloneya oshoyo oilyo yomutumba wopashiwana. 

Omupresidente okwa twa kumwe nokupitika oveta oyo ya pitika ewedelo leendjabi dovaleli ava. Ewedelo leendjabi edi ola tulwa nale moilonga okudja mu1 Apilili 2026. Otaku hokololwa ovaleli ava va wedelwa oimaliwa ya yooloka sheli kolelela komaifano avo. Ovaleli veenghatu dopombada otaku hokololwa tava ka mona ondjabi ya konda pomiliona. 

Omukanda wa pitifwa kOmupresidente owa holola kutya omuprima minista woshilongo ota ka mona omiliona N$ 1,3 kodula. Oshimaliwa ashishe kwa wedwa eumbo oshoyo osheendifo kodula otaka mona omiliona N$1,7. Omanga omupeduprima woshilongo ta mono paife omiliona N$1,1 ondjabi yaye nongeenge okwa wedwa omauwa aeshe kodula ota mono omiliona N$1,4 lwaapo. Eeminista oshoyo oilyo yomutumba wopashiwana navo ova kwatelwa momawedelo eendjabi. 

Eeminista oshoyo omuna wino moikwaveta yepangelo novanambelewa ovakulunhu mepangelo ota va ka mona ondjabi ya wedelwa yomiliona N$1,4 mwa kwatelwa omauwa aeshe. 

Ovapeduminista ondjabi yavo yokodula mwa kwatelwa omauwa paife oili paife po N$969 791. Omanga  omupopiliko womutumba wopashiwana ta mona omiliona N$1, 4 paife noilyo yomutumba wopashiwana keshe umwe otaka mona N$878 706. Ovaleli vopaitukulwa navo komungome wavo wefikuj keshe okwa wedwa.Oongoloneya voitukulwa ota va ka mona N$926 065. Omanga ookonsela voikandjohoololo ya yooloka ota va kwata ondjabi i fike poN$592 836 paife. 

Omhango ipe oya pingafana po omhango ikulu yomomudo 2017. Omhango ipe oya ninga eendjabi dovaleli vepangelo di kale di fike pamwe. 

-amwanyekange@nepc.com.na