RUACANA- Omolwomvula onene tayi loko koAngola, NamPower okwa kumagidha oshigwana shi li popepi noshitaasi sholusheno koRuacana shi kale uupathi omolwa omeya ngoka taga tondoka noonkondo konima omweelo kwali gwa egululwa oshiwike sha ziko oshikando oshitiyali.

Oshigwana onkene tashi talele po omulonga gwaRuacana ngoka guna omeya taga tondoka no taga hili aatalelipo.

Omukuluntu gwoNamPower koRuacana Leonard Shemuvalula okwa ti omolwomeya ngoka taga kunguluka noonkondo, oya thiminikwa okupatulula omweelo oshikando oshitiyali.

“Omulonga oguudha noonkondo, shoka sha ihulwa okumonika mo2011. Omeya otaga kunguluka nookubika 1,800 posekonde,’’ ta popi ngaaka. 

Ta kumagidha kutya oshigwana shili popepi nashi konge omahala gomalukalwa gopakathimbo osho wo oshigwana nashi kale uupathi noku sila oshimpwiyu iimuna opo kashi yi kanithe omolwomeya ngoka ogendji pamwe tagaka thika komahala gawo. 

Shemuvalula okwa kumagidha wo natango aanafaalama yiimuna ya tembudhile iimuna yawo komahala ga yeluka, nokukwashilipaleka kutya omikanka kadhi na sha, oshoka omeya otaga tondoka.

“Otatu kumagidha wo aatalelipo, yi ikaleke kokule nokuthikama kooha dhomulonga osho wo yaa hedhe popepi nomeya oshoka osha nika oshiponga,” ta kumagidha ngaaka.

Ngoloneya gwoshitopolwa shaMusati Immanuel Shikongo okwa kumagidha oshigwana shi kale upathi opo shi tembukile komahala galwe okuyanda ekanitho lyoomwenyo osho wo iinima yawo. Ta ti, oshigwana ina shi tegelela sigo kwa toka opo shi tembuke, uuna sha lopotelwa kutya omeya oga ninga igendji.