Auleria Wakudumo
Ehangano loNamibia Water Corporation Ltd (NamWater) ola holola kutya eendjo domeva neudo oda londa fiyo okeebiliona N$2.4, osho tashi ka tula eandjakaneko needjo domeva moshiponga monakuiwa.
Eshi osha hololwa komupopiliko woNamWater Lot Ndamanomhata molopota ya pitifwa Omaandaxa.
Ndamanomhata okwa ti ehangano ola didilika kutya eendjo otadi londo efiku nefiku nopaife muFebuluali 2025 odi li peebiliona N$2.4.
“Eshi otashi holola kutya omwaalu owa ya pombada neepelesenda 16 okudja kodula ya dja ko. MuJuni 2024, eendjo oda li di li peebiliona N$2.1,” Ndamanomhata ta ti.
Omanga ta yelifa kutya oolyelye ve na eendjo dihapu moNamWater, Ndamanomhata okwa holola kutya omalelo eedoolopa oo e li pombada meendjo, e na eendjo da fika peemiliona N$776 omanga omeva okomikunda e li peemiliona N$676.
Omahangano opaumwene oku na eendjo daNamWater da fika paife peemiliona N$341, omalelo oomuni oku na eendjo deemiliona N$211 nomalelo okomikunda e na eendjo da fika peemiliona N$146.
Ndamanomhata okwa weda po ta ti NamWater ina wedela omeva oule weedula nhee da ka pita nonande ovanhu va nyengwa okufuta eendjo davo domeva notadi londo keshe fiku.
“Ovanhu ngeenge ova kala inava futa ko eendjo davo, otashi eta eshunomonima loilonga ihapu yaNamWater ngaashi okupangela oikwatelwa yomeva oyo ya kulupa osho tashi ka eta epato lomeva,” Ndamanomhata ta ti.
Ndamanomhata okwa twikila okuyandja ouyelele womalelo e na eendjo daNamWater. Okwa ti okudja mo28 Febuluali 2025, omwaalu weendjo domalelo eedoolopa ou li keemiliona N$889.
Elelo lodoolopa yaRundu olo li li pombada meendjo, li na eendjo da fika po N$333 926 128, omanga elelo lodoolopa yaRehoboth la shikula oRundu noN$ 108 488 463.58.
Elelo lodoolopa yaKhorixas oli na eendjo da fika po N$71 789 424.75 nonande elelo ola tula po eudafano noNamWater.
Elelo lodoolopa yaTavi ola fikama keendjo do N$70 593 428.63, elelo lamuni waKeetmanshoop li na N$56 621 020.94 ,omanga elelo lodoolopa yaPuwo li na eendjo da fika po N$520 049.86.
Elelo lodoolopa yaGobabis oli na eendjo daNamWater da fika poN$ 45 273 852.92, Karasburg okwa fika ko N$35 659 339.67 nOtjozondjupa i na eendjo di fike poN$35 190 926.51.
Ndamanomhata okwa weda po ta ti elelo lodoolopa yaKakarara oli na eendjo do N$34 131 722.60, Gibeon li li po N$25 095 656.32 nOmaheke e li po N$24 769 251.92.
Ndamanomhata okwa yelifa kutya omanga epangelo okupitila moNamWater hali yandje eepelesenda 87% domeva kovakwashiwana, otashi ka kala shidjuu okuwedela ko keepelesenda odo ile okuyambula po nokuxumifa komesho oNamWater molweendjo.
“NamWater ehangano lepangelo olo le likwatelela ashike kofuto yovakwashiwana. Ehangano ihali mono oyuuyemo yasha okudja komahangano opaumwene ile a wedwa po. Ngeenge omalelo eedoolopa inaa futa eendjo davo, ohashi eta NamWater a kale ina wanifa po omaudaneko aye aeshe kovakwashiwana,” Ndamanomhata ta ti.
Futeni
NamWater ota indile keshe ou e na eendjo domeva opo va kwashilipaleke kutya ova futa.
“NamWater ota indile eenhele depangelo adishe di na eendjo neenhele dopaumwene di mane okufuta eendjo davo opo ku kelelwe epato lomeva,” Ndamanomhata ta ti.
Oshilanduli
Ndamanomhata okwa ti ngeenge ovanhu ova kwikile nokukala itava futu eendjo davo, NamWater ota ka kufa onghatu yopombada opo ovanhu va fute eendjo davo.
Eshi otashi ningwa opo NamWater a kwashilipaleke kutya ota dulu okuyandja omeva kOvanamibia aveshe monakudiwa.