Omulumenhu weedula 38 ou kwa li a tambulilwa moshipangelo shaTsumeb shaashi a dengwa kovakwashiwana konima a dipaa xemweno neonga okwa lekelwa mo moshipangelo.

Omupopiliko wopolifi koshitukulwa shaKavango West Chief Inspector Raimbert Muronga okwa koleka ta ti omufekelwa ou okwa ninga oshivike meembete koshipangelo ta mono epango lopaunamiti.

Okwa ti okwa li a monifwa oshiponga kovakwashiwana.

“Omufekelwa oku li kodolongo koshitaashi shopolifi koNkurenkuru. Ota holoka momhangu nena nota pangululilwa oshibofa shedipao,” ta ti.

Nakufya Kuip Daniel omukalimo womomukunda Bravo, okwa xulifa oshivike sha dja ko meumbo lavo.

Otaku hokololwa kutya okwa li tava nu omalodu meumbo laye pamwe noshitenya shaye eshi shi li omufekelwa paife.

Opolifi oya hokolola tai ti okudja opo ova tameka tava tanguna ndele nokutuwa neonga.

Natango oshivike sha dja ko, koshitukulwa shaKavango West okwa lopotwa omukulupe weedula 64 a xulifa shaashi a dengwa nomupini koshitenya shaye.

-fhamalwa@nepc.com.na