Oshikondo shounamapya moshitukulwa shaShikoto osha tunhila eengobe dili 12500 komukifi wombulwa koshikandjohoololo Omuntele Etitatu.
Eshi osha ningwa molwa eengobe 528 oda monika omadidiliko omukifi wombulwa mOmuntele.
Eengobe edi oda tunhilwa melongelokumwe nombelewa yangoloneya waShikoto Sacky Kathidi.
Kathidi okwa ti koshikandjohoololo Omuntele okwa lopotwa omeva efundja omo omikunda dihapu di li koshi yomeva.
“Ovanafaalama vahapu ova kumwa kefundja molwashi eehambo davo oda kondekwa komeva. Otwa didilika ovanahambo va pumbwa oikulya noshoyo omayakulo opaunamiti,” ta ti.
Kathidi ou e li ngoloneya mupe opo aulikwa omwedi ou, okwa ti okwa pula oshikondo shopolifi opo shi yambidide nedakataka nelalakano lokutwala omayakulo opaunamiti koshiwana.
Okwa weda po ta ti eendjila odi li koshi yomeva osho sha eta opo eetuwa diha fike ko vali koshiwana.
“Ombelewa yange melongelokumwe nombelewa yomulukunhuwiliki wouhaku oya tuma ovapangi opo va ka yandje omayakulo opaunamitti koshiwana sha ninga oihakanwa yefundja,” ta ti.
Kathidi okwa ti ombelewa yaye otai ka ninga omalongekido okukala ya twalela oihakanwa yefundja oikulya.
Ngoloneya okwa kumaida oshiwana opo shuha tauluke omeva molwashi osha nyika oshiponga. “Ovanhu ina va pumbwa okulya ombelela yeengobe da fya komukifi wombulwa,” ta ti.
Okwa weda po ta ti ovanhu nava lopote pefimbo ngeenge va didilika eengobe davo dina omikifi donhumba. Okwa yelifa ta ti omeva efundja okwa kunguluka okudja koshikandjohoololo shaKatyali osho shi li moshitukulwa shaShana.
“Oshikandjohoololo ashike shaMuntele ku na efundja,” ta ti.