Auleria Wakudumo 

Ehangano lokuandjaneka omalusheno (NamPower) ola holola kutya eendjo dolusheno neudo oda londa fiyo opeemiliona N$912, osho tashi ka tula eandjaneko needjo dolusheno moshiponga monakuiwa. 

Eshi oshahololwa komukulunhuwiliki woElectricity Control Board (ECB) Robert Kahimise pefimbo ta holola omhangela yo-ECB ipe Etitano moshilandopangelo. 

Kahimise okwa holola kutya omalelo eedoolopa nomahangano epangelo ihaa futu oishoshela yawo nokwa tula omwaalu weendjo dolusheno pombada neemiliona N$5 557 okudja mo25 Novemba neudo. 

“Elelo lodoolopa yaMariental olo li li pombada neendjo deemiliona N$5 233, taku landula oGobabis i na eendjo deemiliona N$570. Karasburg naye oku na eendjo dolusheno da hanga peemiliona N$59, Aranos eemiliona N$58, elelo lomukunda waMaltahohe oli na eendjo deemiliona N$34, Gibeon oku na eemiliona N$24 omanga elelo lomukunda waBethanie lina eendjo deemiliona N$2,” Kahimise ta holola ngaho. Omukunhuwiliki okwa holola yoo kutya o-ECB oya pitifa notai ka tula moilonga omhangela oyo hai ifanwa oIntegrated Strategic Business Plan (ISBP) okudja momudo tau ya fiyo 2031. Eshi osha ningwa shaashi omhangela ei i li po otai xulu muMaalisa omudo tau ya. Sha hala kutya, omhangela ipe otai ka tulwa moilonga opo ku kwashilipalekwe kutya ehangano otali twikile okuandjaneka olusheno koshiwana. 

Kahimise okwa weda po yo ta ti nande omalelo odoolopa mahapu e na eendjo deemiliona omayovi, dimwe oda hovela okufuta kashona nakashona. Omalelo oo a hovela okufuta ko oishoshela yao okaendanamhadi oku na eendjo da konda peemiliona N$210. “Elelo laRehoboth olo limwe lomomalelo oo a tameka okufuta ko eengunga davo. Rehoboth okwa tula mo eindilo lokufuta okudja muMai odula ya dja ko molwaashi eengunga davo odali meendjo deemiliona N$12, osho kwa li tashi dulu okweeta olusheno lavo li tetwe ko,” omukulunhuwiliki ta holola ngaho. Kahimise  okwa ti omhangela ipe otai ka kwashil ipal eka okunghonopaleka olusheno moshilongo. 

Omukulunhuwiliki okwa holola yoo kutya ehangano ole lilongekida okulonga nomikalo dokuandjaneka olusheno da yooloka monakuiwa. 

Kahimise okwa weda po kutya omalelo oitukulwa, omalelo opamifyuululwakalo, eembe l ewa depange l o, eembelelwa dokuandjaneka olusheno moitukulwa oshoyo omahangano epangelo okuna eendjo di fike peemiliona N$72. 

Luderitz okuna eendjo da fika peemiliona N$22, muni wodoolopa yaKeetmanshoop okuna eendjo deemiliona N$20, elelo loshitukulwa shaKaras olina eemiliona N$10. NamPower okuna yoo eendjo daye kehangano laAngola hali ifanwa Angola’s Utility Company (Rant). 

Ehangano lokuandjaneka olusheno ola taal e lwa komashongo ngaashi ehapupalo lelongifo lolusheno novanhu vahapu va hala olusheno, omashongo amwe ngaashi okukufa ile okunana olusheno kondje yoshilongo, eendado dolusheno, okuandjaneka olusheno longushu moshiwana nomashongo akwao a wedwa po. 

Omangela ya pitifwa otai ka tulwa moilonga okudja muMalitsa womudo tauya ngeenge ei ikulu oyeya pexuulilo. 

-wakudumoauleria@gmail. com