Oshimaliwa shi fike peeN$414 000 osha ongelwa kouvalelo wowina oo kwa li wa longekidwa kelelo lodoolopa yaEenhana mexuliloshivike.
Oshimaliwa otashi ka longifwa okulongekida omauliko oipindi oo ta
otaa ka tameka momafiku 29 Juli fiyo 4 Anguste neudo.
Omudo keshe omalelo eedoolopa ohaa ningi omaulikilo oipindi
nelalakano lokueta oyuuyemo meedoolopa noshoyo okueta po eemhito doilonga.
Ongeshefa yoRani Group oyo imwe ya yandja oshimaliwa shihapu sheeN$100 000 taku landula ehangano lOnangwe Construction Investment la yandja oshimalilwa sheeN$52 000.
Minista wemona Iipumbu Shiimi okwa popya ti omaulikilo oipindi okwa fimana molwaashi otaa yambula po eedoolopa tashi pitile mokulongifa oshimaliwa tashi di moipindi. Minista okwa pula omalelo eedoolopa opo a twikile nokuninga omaulikilo oipindi.
Shiimi okwa ti odoolopa yaEenhana oya xuma komesho paife sha etwa komaulikilo oipindi.
“Omaulikilo oipindi otaa yandje omhito kovanyasha va landife oilandifomwa yavo. Ovanhu otava ka mona oyuuyemo yoshimaliwa pefimbo loipindi,” ta ti.
Okwa ti omaulikilo oipindi naa kale taa nane ovanangeshefa okudja koitukulwa ya yooloka noshoyo kondje yoshilongo.
Mayola wodoolopa yaEenhana Omri-Onn Kavandje okwa ti omaulikilo oipindi okwa dana onghandangala ya kula mokuyambula po odoolopa yavo.
“Otwa eta mo eputuko modoolopa yetu. Oshimaliwa osho hatu mono momaulikilo oipindi ile okudilila moshiwana ngeenge tashi futu omayakulo amuni oha shi longifwa okuyambula po odoolopa,” a weda po.
Kavandje okwa ti elelo lodoolopa yavo ota li twikile okuyandjaneka omayakulo koshiwana.
“Oshiwana nashi talele po eembelewa delelo lodoolopa yaEenhana kombinga youyelele nghene shi na okuudifa outala vokulandifila,” ta ti.
– fhamalwa@nepc.com.na