Ouministeli woilonga noyeendifo owa tameka opoloyeka yokutunga eenhopa dokukaama kombada yomeva moilonga, noya teelelika i kale ya pwa moshivike omu.
Opoloyeka ei otai ningwa moshitukulwa shaHangwena konima eshi eefikola dihapu osho yo omataulukilo a pata molwefundja.
Ominista youmisteli woilonga noyeendifo Veikko Nekundi okwa ti epangelo ola yandja eemiliona N$22, odo da landa eenhopa dokukaama kombada ymeva, noda landelwa oitukulwa ya fika puitatu.
Oitukulwa itatu ei ya pewa eenhopa edi oyo Ohangwena, Zambezi, Kavango East noHangwena.
Moshitukulwa shaHangwena omu na ofikola yedina Shingunguma Primary oyo paife ya ninga omukalondjikile kutya efundja ngeenge ole ya, oi na okupata. Opoloyeka yeenhopa eshi ye ya, oya hanga nale Shingunguma a pata, osho yo Onghala Primary molwefundja okudilila moAngola.
Nekundi okwa ti ouyelele ou owa fika kombelewa yaye, nova endelela opo va mbestele eenhopa okudilila koChina.
“Nonande twa fa twa laata kashona shaashi eenhopa eshi da fika oda hanga nale eefikola dimwe da pata, omolwangaho omalongekido oo haa pula efimbo okudja kondje yoshilongo, shike onda panda shaashi paife oilonga otai hale okupwa moitukulwa aishe,” Nekundi ta ti.
Kansela woshikandjohoololo shaNgenga Joseph Nenghwanya okwa ti eefikola edi hapo lotete tadi pate kefundja, ndele keshe odula konyala ohadi pate.
“Neudo otwa kendabala lela pamufika wopashitukulwa fiyo opa pa hatu dulu, opo tu dule oku yandja omakwafo oshoyo omatwomukumo kovanafikola osho yo keefikola,” ta ti.
Okwa ti ihashi kala efano liwa okutala ounona ve li momaumbo, manga pe na omakwafo taa dulu okuyandjwa. Nenghwanya natango okwa yandja yo olupandu linene kepangelo eshi la endelela po okukwafa ovanhu vomoshutukulwa shaye inapu kalwa.
Eenhopa shima da pu, eefikola edi da li da pata odi na okupatuluka opo ounona va twikile nehongo. Okwa twikila yo kutya otadi ka kwafa ovakwashiwana, unene ovakulupe va dule oku taulukifwa omeva va manguluka.