Odoolopa yaMuthiya moshitukulwa  shaShikoto oya teelela okumona otenga yayo yotete yakula, yokupungulila ovakalimo vomeni lodoolopa omeva. 

Edi oda popiwa komupopiliko wodoolopa yaMuthiya Martha Andreas, konima eshi elelo lodoolopa la li li na omutumba novanambelewa okudilila keembelewa doNamwater shi na sha netungo lotenga yakula yomeva tai dulu okukwafa ovakalimo vomodoolopa efimbo lile nande omeva okwa pata. “Eenghundafana edi oda li tadi nyakula noku yuwifa omatwi, shaashi fye modoolopa otwa ninga efimbo hatu dengwa koikwatelwa yokupungulila omeva,” Andreas ta ti. Andreas okwa yelifa kutya inava kala lela vena otenga yakula yokupungula omeva ngaashi ei Namwater a hala okuyandja. Otwa kala ashike hatu xupile moutenga vashona, ovo nokuli ihava dulu okupalufa odoolopa aishe koonono.

Okwa twikila kutya omeva modoolopa ohaa longele pamwe nolusheno. 

Nena ngeenge olusheno ola uko, omeva nao ngaho otashi ti okwa pata. “Omeva ngeenge nee okwe tu patele modoolopa, outenga ava ve li mo ohava dulu ashike okukwafa odoolopa oule weetundi hetatu,” ta ti. 

Okwa ti moule weetundi hetatu omo, itashi ti ovanhu aveshe ava va pumbwa omeva ngaho ova kwafwa, ndele otashi longo ashike naau e litetuka shaashi odoolopa aishe omo ya teelelika i xupile moutenga omo. 

Andreas okwa yelifa kutya outenga nee ovo navo kave li mo vawana modoolopa, ove li mo ngaho tava valulwa. 

Opoloyeka ei inai tumbulwa kutya  otai ka etwa mOmuthiya naini, ashike Andreas okwa yelifa kutya okudja momutumba wonghela, etemo otali ka ya momupini. Okwa weda po yo kutya omutengenekwa woshimaliwa nao inau tumbulwa, ashike moule womafiku axupi NamWater oku na okukala e wu eta pouyelele. 

Omuthiya odoolopa yakula moshitukulwa shaShikoto, ashike nayo oya kala tai nane noudjuu. Manga odoolopa tainane noudju kombinga yomeva, kombinga ikwao yoshitukulwa ovakalimo otava nane noudju shaashi ohavanu ashike omeva ehadi oshimongwa. Eembola dimwe moshitukulwa nokuli oda patwa shaashi omeva okwa lula, nokwa pumbwa oku wapalekwa. Ngoloneya woshitukulwa Sacky Kathindi okwa ti ovanambelwa vaNamwater navo oveli pyakidila nokutula oinima peenhele opo vatameke opoloyeka yokuwapaleka omeva adule okudja oshimongwa. 

Taimihaihambo2000@gmail.com