Ombaanga onene yaNamibia oya pititha pambelwa oshimaliwa shefo shoN$60 shoka shi na efano lyomupresidente omutitatu gwaNamibia Hage Geingob. 

Geingo okwa hulitha omumvogali muFebuluali pethimbo a li koshipundi shuuleli. 

Omukuluntu gwombaanga onene yaNamibia Johannes !Gawaxab, okwa fatulula kutya oshimaliwa shoka osha tulwa efano lyaGeingob ongendhindhiliko nesimaneko lyaashoka a longele oshilongo shika.

“N$60 odha tothwa mo okuulika ethimbo ndyoka Geingob a kala nokulongela uuwanawa  nokutunga oshilongo shaNamibia okuza meni lyoshilongo, okuya kombanda sigo a galukile moNamibia,” ta fatulula ngaaka.

Ta ti, momukalo nguka Geingob ota kala ta dhimbulukwa momukalo gumwe gwi ikalekelwa nogwa yelwayelwa.

Okwa yelitha kutya oshimaliwa shoka otashi pitithwa ashike lumwe onkene ngele osha andjanekwa otashi kala endhindhiliko mondjokonona yaNamibia.

Omupevipresidente Netumbo Nandi-Ndaitwah okwa pandula ombaanga onene sho ya simaneke omupresidente omutitatu gwaNamibia momukalo itaagu dhimbiwa.

“Geingob osho wo omukokolipresidente Sam Nujoma oya thigi ya tula oshilongo shika ponkatu ombwaanawa onkene oye na okusimanekwa nonando ya hula ko nale,” ta popi ngaaka.

Ta gwedha ko kutya iiyimati tayi tyapulwa nena, omolwawo.

Omupresidente gwaNamibia Nangolo Mbumba okwa ti shoka sha ningwa kombaanga onene yaNamibia otashi tumbaleke Geingob.

“Nonando Geingob ke ko we, otatu mu dhimbulukwa momikalo odhindji ngaashi tatu tala koshimaliwa shika N$60 shefo. Ondjokonona ndjoka tayi kala yaaluhe,” ta popi ngaaka.

Omukulukadhi gwaGeingob, Monika Geingos okwa fatulula onkalo yomusamane gwe osho wo iilonga kwa li ta longee oshilongo she, opo shi kale mpoka shi li nena.

“Geingob okwa li e na oshilongo she komutima nokwa li ha kala e shi halela ponkatu mpoka pu na iilongo iikwawo opo kehe Omunamibia a kale u uvite uugumbo woshilongo shawo,” ta popi ngaaka.

Ta ti, nena ota kwashilipakeleke iizemo yiilonga yomusamane gwe, nota pandula ombaanga onene sho ye mu dhimbulukwa momukalo ngoka.

-vkaapanda@nepc.com.na