ONGWEDIVA – Oitukulwa imwe yokonooli unene oshitukulwa shaHangwena osho yo Omusati keembinga dimwe, oya ninga efiku i li monghuwo ina onghambe, konima eshi ounaala vaAngola nomilonga da ponoka omeva efundja oo a fika moNamibia, nokwa diinina unene pomikunda edi da dingilila odoolopa yaShikango moshitukulwa shaHangwena.
Odula ya dja ko omupresidende woshilongo Dr. Netumbo Nandi-Ndaitwah okwa yandja etumwalaka moshiwana la yukilila omalelo opamifyuululwakalo, kutya ovakwashiwana ava ve na omaumbo e li peenhele hadi yada omeva, nava ningilwe onghendabala komalelo opamifyuululwakalo va tembulilwe keenhele edi ihadi yada omeva.
Nandi-Ndaitwah eshi okwe shi popya shaashi konyala keshe odula ovakalimo unene moshitukulwa shaHangwena alushe ohava tembulwa momaumbo avo aa haa kala eli koshi yomeva pefimbo lefundja, oo omeva ngeenge okwa pwiinine, natango tava shuna pomalukalwa avo.
Natango elalakano, okuxupifa yo oimaliwa yepangelo ei hai longifwa mokukwafa ovanhu ava hava kala va ponokelwa kefundja.
Kundana eshi aya meengundafana naumwe woshilyo shelelo lopamufyuulukalo moshitunda shOvakwanyama Toivo Shiweda, okwa yelifa kutya fiyo opapa inava dula okutula elombwelo lomupresidende lokuyandja omapya komitunda kovakwashiwana moilonga.
“Elalakano letu eshi inatu dula oku shi ninga osheshi kutya inatu mona nande omukwashiwana umwe e ya kufye ta pula kutya okwa hala okutembulwa moshana, a ye komutunda fye tu dule oku mu pa edu,” ta yelifa .
Okwa ti edu opo li li notali yandjwa ashike ngeenge ovakwashiwana ava va hala omadu ova shangele koovene vomikunda kutya ova hala okutembulwa meeshana va tulwe komitunda ngaashi Nandi-Ndaitwah a ti.
“Ou wa fikama nowa shanga onhumwafo yoye tai holola oupyakadi ou wataalela molw efundja, ou na oufemba wo ku i twalwa koomwene womukunda, ile kelelo lopamufyuululwakalo li li po pepi naave ndele tomono ekwafo,” ta ti.
Shiweda okwa ti shimha ovakwashiwana va shange omakemo avo , elelo ohali ka kala omutumba nombelewa yO hamba yOvakwanyama Martha Mwadinhomo yaKristian Nelumbu opo i dule okuyandja omatokolo axuuninwa.
Olivia Mowoonde omukalimo waMhedi moshitukulwa shaHangwena okwa ti ye ka li e shi kutya oyo ondjila e na okweenda oyo.
“Fye out li ashike apa twa teelela tu ke lishangife, mboli out na okuyandja omakemo etu fyee vene meembapila. Ohandi kendabala ndi wanife po keshe osho nda pulwa shaashi onda loloka efundja,” ta ti.