Egeelo…Kehe ngoka ta ka langela okapuka ota ka ungawungiwa naye

Home Eenguhudana Egeelo…Kehe ngoka ta ka langela okapuka ota ka ungawungiwa naye
Egeelo…Kehe ngoka ta ka langela  okapuka ota ka ungawungiwa naye

Omupopiliko melelo lyopamuthigululwakalo laNgandjera Shiimi Shangula okwa ti kehe ngoka taka langela okapuka otaka pewa egeelo.

Shangula okwa li a popi ngaaka, sho kwa li ta kumagidha oshigwana shi simaneke nokugwanitha po oompango dhelelo lyopamuthigululwakalo adhihe.

“Ongandjera oya ponokelwa kaantu ya za kiitopolwa yi ili noyi ili, ye ya okulikola okapuka, opo ya ka landithe omanga yamwe taya kongo omweelelo gokulya momagumbo,” ta fatulula ngaaka.

Okapuka okambaambala okatoye, hoka haka monika ka fa omagungu, ihe okashona molutu.

Shangula okwa ti, elelo lyOngandjera kali na nando uupyakadhi waantu taya likola okapuka, ihe oye na ashike uupyakadhi waantu taya langele okapuka momakuti.

“Aalikoli yokapuka naya kale ya gongala pehala limwe, mpoka taya kala taya lala ayehe. Kashi shi ethano ewanawa momakuti mu na ashike ootenda dhi na aantu ya kalela okapuka,” ta popi ngaaka.

Ta gwedha po ta ti, elalakano kali shi lyokufuka okapuka ka likolwe, ihe olyokugamena uushitwe.

“Yamwe oye na oohanona, ihe sho taya hula aanona omilambo, otaya ekelehi ashike pevi, shoka kaashi li nando mondjila omolwuundjolowele wiimuna yi li momakuti moka,” ta popi ngaaka.

Shangula okwa fatulula kutya, kehe ngoka taka likola okapuka na kale e na ombapila yepitikilo, ndjoka hayi futilwa N$200 omanga mboka yena oohauto taye dhi futile, oshimaliwa N$250.

‘’Kehe gumwe okwa manguluka okulikola okapuka, ihe mboka ya za kiitopolwa yilwe ohaya futile ombapila yepitikilo ondando ya yooloka,”Shangula ta ti.

Ta gwedha po kutya aakalimo yomomikunda ndhoka dhi na okapuka, itaya ka pewa epitikilo lyokulikola, ihe mboka oya manguluka okulikola ethimbo alihe, omolwokatendo hoka ke li po kutya omukalimo kehe oku na okutyapula uuwanawa womomundhingoloko gwe.

“Mboka taya ka konda oompango dha tulwapo nenge itaaye ke dhi gwanitha po otaya ka pewa egeelo lyokufuta oshimaliwa N$1 000, ethimbo olyo tuu ndyoka,” ta yelitha ngaaka.

Omikunda dhimwepo ndhoka tadhi kolwa okapuka ongaashi Akuutsima, Onakatili, Okolumono, Onambandje, Okakoto, Okanamutenya, Uutsathima, Olumpelengwa, Okeehongo, Okakewa, Amarika oshowo Itapa.

Maria Shigwedha, omulandithi gomOshakati okwa ti oha landitha kehe shoka tashi vulu oku mu etela iiyemo sha ikolelela kethimbo.

‘’Ohashi tu yematitha onga aalandithi ngele tatu futithwa iikulya yopaushitwe, mbyoka hatu ka konga noonkondo dhetu oshowo oshimaliwa sha gwedhwa po sholefa okuya hoka taku likolwa okapuka,” ta nyenyeta ngaaka.

Ta pula kutya, oshike ye na okufutithwa oshimaliwa?  

Ta ti, okapuka ihaka tekulwa, ihe ohake ya po pamukalo itaagu pula nando oshimaliwa.

“Oompango dhimwe otadhi tu monitha iihuna  unene, nonando otatu kambadhala. Ngele nda futu oshimaliwa shepitikilo shoka, natango ondi na okulanda iikulya yomasiku ngoka te kala hoka, nonando ondi na okugwanitha po oompumbwe dhilwe,” ta popi ngaaka.  – vkaapanda@nepc.com.na