Muhuka Oroviungura omayuva tjiyeri 21 ku Seninarindi ehi otji ma ri tjiri na ri zemburuka ozombura o-36 zongutukiro yaro mo 1990.

Omazemburukiro wombura indji maye panguka komazemburukiro wozombura azehe tjinga motukondua atuhe o-14 ama mutjitirwa omazemburukiro owo ngu ma ye ka e yendera tjimwe. 

Oyo ndjiri ondando yokuvasisa omazemburukiro inga ku kangamwa mouparange wehi popezu aharire kokutja ovandu avehe imbo mbu ma veyenene nokusora mave tungukire korukondua rumwe uriri otja tji pekara atuhe kutja omazemburukiro yeri motjirongo tjimwe morukondua rumwe. 

Ngunda ohapo wina otukondua nao atu kara nomazemburukiro wato po siya oyo nge ha tjitjirwa oruveze rumwe eyuvando orini rongutukiro. Nungwari otuveze tjiva nge karako kombunda yeyuvandi. 

Omazemburukiro womburandji yeri kehi yembo ehongonekwa ndi ma ritja: “Kombunda yo 35: Oruyaveze Orunarwaze.”

Orukondua aruhe rwa kwizikirwa Ozondora za Namibia omayovi o-250 okusembamisa nazo omazemburukiro waro. Motjomuise omazemburukiro wokotjiveta ohongora yeri porutjandja rotjimbere indui Osam Nujoma mOkatutura momaturiro inga Ondorama. 

Kakutja inga oomayandero nomautiro womazemburukiro wongutukiro motjihuro ohongora tjinga otja tjarira ombazu ovature votjihuro kourike wawo kutja omo Matundu wawo poo omovimbumba vayo otja kozosaneno zovimbumba pekepeke, ama ve zemburuka eyuvandi noviyorokise vyozosaneno pekepeke kutja oku katetemisa okanyama potuveze pekepeke two me ri naneno motjihuro ohongora tjimuna Ondama indji Ogoreangaba poo Oupaaltjies nanao. Ovitjitua mbi ma vyutu ndino ngurova nomukandi womizumbi pOtjikunino Tjovipuka mondivitivi yotjihuro.

Ngunda wina Otjiuru tjehi Omutjunikua Netumbo Nandi-Ndeitwah amayakura ovaheņendu pekepeke, mumuna ovakuramenepo vomahi yarwe mo Namibia, pOndjuwo yEhi.

MErongo ovitjitua viri porutjandja indui Ousaba mOtjandjomboimue; mOshana omo Shakati pOrutjandja rOngutukiro nu mo Tjoruuma mOrukondua rwa Hardapa opOrutjandja rOmanyando. 

MOkunene ovitjitua vyomazemburukiro viri mOtjaheundu nu mOtjozondjupa aviri mOtjiwarongo porutjandja romanyando indui Omokati. 

MOmaheke omazemburukiro yeri mOtjihuro ohongora Epako porutjandja romanyando indui Olegare. 

Ovitoore mavi rongerisiwa okuvasisa otjiwana komazemburukiro otja kohepero ndji ma imunikua mu kangamwa otjihuro mu muna omazemburukiro otja kounene watjo noukokure woruveze pupena omazemburukiro kotjiwaṋa okuvaza.