Zebaldt Ngaruka
Omupeviminista gomayambulepo goondoolopa niitopolwa yokuushamba Evelyn Nawases –Taeyele okwa ti oshinakugwanithwa shokutunga Otjinene inashi kala ashike komapepe gelelo lyomukunda, ndele naakwashigwana naya ete wo iipambu yawo. Ta popi petyapulo lyedhimbuluko lyoomvula omulongo dhelelo lyOtjinene, Nawases-Taeyele okwa ti aakwashigwana nayo wo oshilonga oshinene okudhana onkandangakla mehumokomeho. “Otandi mu kumike mu kuthe ombinga miinyangadhalwa yelelo, indeni kiigongi, ee tamu gandja omakemo geni. Uudhigu weni nau uvikiwe ko opo ga tulwe milonga uuna taku ningwa omathaneko,” ta ti ngaaka.
Omupeviminista okwa li a lombwele aakalimo ya gandje omakemo gawo uuna ya pumbwa nenge ya hala oshinima shontumba shi lunduluke.
“Melongelokumwe, otatu longo e tatu kwashilipaleke kutya omayakulo tatu gandja otaga kandula po oombumwe dhaakwashigwana yetu ayehe,” Nawases-Taeyele ta ti ngaaka. Ta ti oshituthidhimbulutho shika otashi ndhindhilike oomvula omulongo dhekoko lyeliko, omayakulo osho wo elongithonawa lyoonzo.
“Sho tatu tyapula ngeyi, natu ipuleni ondjila ndjoka twa enda. Otu na okwiipula ngele otwa adha tuu omalalakano getu, nenge pamwe otwa puma mo mondjila, naashika oshe tu fala peni? Omupeviminista ta ti ngaaka. Nawases-Taeyele okwa ti wo ndika ethimbo lyokudhiladhila onakuyiwa. “iilonga mbyoka twa longa oya simana, ashike shoka etameko ashike. Natango otu na oshindji tatu shi lalakanene,” ta ti ngaaka.
Okwa li wo a tumbaleke elelo pamwe naakalimo yomOtjinene mboka ya longa nuudhiginini okuyambula po omukunda gwawo.
“Kwaamboka mwa longa noya pita po, iilonga yeni kape nae siku tayi dhimbiwa. Out na ongunga yeni onene sho mwa longo nuuudhiginini,” ta ti ngaaka.