Auleria Wakudumo
Ekopi lounyuni loudano wocricket wovadani ovo ve li koshi yeedula 19 olo tali danenwa moNamibia osho yo moZimbambwe otali ende nawa fiyo opapa.
Oilongo oyo ya patuula okapale kaNamibia moWindhoek Afghanistan, South Africa, West Indies noTanzania. Eshi va dana olweefo lwotete, Afghanistan oyo ya pondola okudenga South Africa omanga West Indies a denga Tanzania.
Omanga kokapale kaZimbambwe, oiti oya teka pokati kaIndia naBangladesh. India okwa pondola okulafa Bangladesh oupuka eshi a pondola okuakela etanga la xuuninwa olo leva kufa koshi.
Otaku hokololwa omakondobolo ali taali ehete pokati koilongo ei ivali. Aishe oya shiivika nawa kutya oyo hai dana oudano wocricket dingi mounyuni.
Moudano ou, Vihaan Malhotra waIndia oo a pondola okuvenifa oshilongo komunute waxuuninwa oye a mona epapa lomudani dingi. India okwa pondola okuvena oikando ivali mekufombinga loudano ou.
Natango noNamibia, Sri Lanka okwa pupula Japan ondwi eshi a vena po oudano wavo oo wali wa ningiwa moWindhoek.
Omudani dingi moudano ou okwali Viran Chamuditha waSri Lanka. Chamuditha okwa ninga yoo ondjokonona eshi a ninga omudani wotete oye a tula mo ekoola dihapu.
Oudano woCricket owa patululwa pambelewa Etinhe kuMinista wehongo, oungoba, omaudano novanyasha Sanet Steenkamp.
Oilongo tai kufa ombinga ongaashi: Australia, South Africa, Afghanistan, Japan, Ireland, Tanzania, Sri Lanka oshoyo oWest Indies.
Oudano owa hovela Etinhe nowa teeelwa u ka kale we ya pexulilo momafiku 26 Januali 2026. Oudano ohau hovele alushe potundi 09h30 noposhivelo shokapale itapa futilwa.
