Auleria Wakudumo 

Elelo lodoolopa yaShakati onghee ngaho le lipyakidila okukwafela ovanangeshefa vanini nosho yo ovakalimo tava nane nonhatu opo va dule okufuta omayakuko avo. 

Omupopiliko welelo lodoolopa, Katarina Kamari, okwa ti eendjo dovakwashiwana mOshakati oda li da fikama poN$80 224 302 momudo 2022 nokupitila mopologalama oyo yeyambidido, muJuni 2023 eendjo oda shuna pedu noN$60 897 123. 

“Eshi osha shunifa eendjo pedu neepelesenda dihapu novakwashiwana otava twikile okufimaneka nokufuta oishoshela yomayakulo amuni,” Kamari ta ti. 

Eshi oshi li oshinakuwanifwa shelelo lodoolopa okukufa omikundu dimwe komapepe oshiwana unene pefimbo lopaife omaxupilo a ninga madjuu.

Odula ya dja ko muSepetemba, elelo ola shivifile kutya oishoshela aishe ya li komayakulo ovakalimo otai ka dimwa po. Elelo ola kufa etokolo e li opo li twe omukumo ovakwashiwana aveshe hava longifa omayakulo amuni opo va fute ko eendjo davo. Konima, elelo ola ti ovakwashiwana vahapu vati ova futa oishoshela ya xupa ko.

Kamari okwa ti elelo okutwikila okukwafela oshiwana momukalo wa tya ngaha, otashi va kwafele okushakeneka eemhumbwe davo unene dopashimaliwa.

Okukufa ko koishoshela yomayakulo amuni ohashi ningilwa ovanhu aveshe, mwa kwatelwa ovakwashiwana, eefikola, eengeshefa, omahangano omoshiwana, eengeleka, omahangano epangelo oshoyo opaumwene. 

Kamari okwati osha fimana okushiiva nokukoneka kutya oishoshela yeendjo ohai i pombada keshe omwedi ngeenge owa kala ino futa. 

“Onghene ovakwashiwana aveshe hava longifa omayakulo a muni opo va twikile okufimaneka nokufuta omayakulo taa longifa, opo odoolopa i shiive okuxuma komesho,” Kamari ta ti. -wakudumoauleria@gmail.com