Aafuko mboka ya yakelwa iikutu yawa oya ti ohango yawo itayi shuna monima nande onaya kale kaaye wete mpoka taya kwata. 

Ohango yaSakaria Kandadi nomukiintu gwe Andreheid Albin oyi na okwiigidhitha Osoondaha tu uka. Ashike oshiwike sha zi ko okofa ndjoka aniwa yi na ofeyi yomufuko, uulinga, ooshuta osho wo oongaku dha li dha nuninwa, omayigidho oshowo esiku lyohango oya yakwa po.

Kandadi oha longo ongomukeeleli gomaliko omanga  Albin iha longo.

Oshituthihango shawo otashi ka kala ko momasiku 30 -31 gaAguste.

Kandadi ta ti, ohango ihayi shuna monima, noyawo oyi na owala okuya komeho.

Ta gwedha po ta ti, oya dhengwa pomutima nomuholike gwe, oshoka kaye na we oshimaliwa shoku ka landulula iinima yohango.

“Ngele inatu mona sha tu vule okukalandulula iizalomwa yetu oshowo kehe shoka sha yakwa po, otatu dhana ashike ohango yetu naashoka tu na po,” ta po pi ngaaka.

Kandadi okwa popi ta ti, nonado ya kala taya dhengelwa oongodhi okuza moshigwana kutya ope na mboka ya hala okuyambidhidha, kape na shoka ya pewa sigo opaife, ashike oye na omukumo oshoka oongodhi otadhi dhengwa shili.

Ta gwedha po ta ti, oya uvanekelwa okuthanekwa oshali komuthaneki gumwe ngoka ta iyamba. 

Aaholike mboka anuwa oya kala omimvo dha thika puheyali noya kala taya longekidha ohango yawo ethimbo.

Kandadi okwa ti oshigwana na shi kotokele oonakukotoka yuutoo, mboka taya ka longitha oshiningwanima shika, onkene kehe ngoka ta kala a hala okuyayambidhidha na dhenge konomola 081 3555 151 nenge 081 6717 7725.

Opolisi moshitopolwa shaHangwena oya ti oshiningwanima shoka osha holoka oshiwike sha zi ko, ihe sigo onena inaya mona po uuyelele washa.

“Shoka tashi taambathanwa komalungula kutya okofa oya monika ya adhika momeya, kaye na uuyelele musho,’’ ta po pi ngaaka.

-vkaapanda@nepc.com.na