Auleria Wakudumo
Elelo lodoolopa yaNdangwa ola udaneka opo li kale tali deula ovalihongi vomoshiputundilo shoCosdec oule weedula nhano.
Ovalihongi otava ka pewa omadeulo moilonga yokomake ngaashi okutunga, okuxwikila, omadewo meekombiuta, okuhondja naikwao ya wedwa po.
Omukulunhuwiliki wodoolopa yaNdangwa Ismael Namgongo okwa holola kutya elelo lodoolopa yaNdangwa onghene tali twikile okukwafela okukwafela oshiwana nokukwashilipaleka kutya otali yandje omadeulo a wedwa po kovakalimo vaNdangwa.
“Elelo lodoolopa yaNdangwa otali longele kumwe naCosdec okukwashilipaleka kutya ovalihongi ova mona omadeulo a wana po momaifano avo oo taveli hongele.
Osha fimana yo opo ovahongwa ovo taveli hongele oilonga yokomake va mone omadeulo taa wapalele oilonga yavo yokomake,” Namgongo ta ti.
Namgongo okwa weda po ta ti otava ka yandja omadewo kovahongwa vape naava vakulu vaCosdec, notava ka yandja omadewo aa kovalihongi voCosedec yomOndangwa.
“Elelo lodoolopa yaNdangwa ola enda nokulunduluka oule wefimbo.
Etokolo lokulongela kumwe noCosdec otali kwafele ovahongwa va mone owino melihongo lavo, omanga tava xumifa odoolopa komesho mokutunga, nomokulonga oilonga imwe ya wedwa po,” Namgongo ta ti.
Namgongo okwa holola yo kutya eyandjo loilonga kovahongwa ovo taveli deula ola kwatela mo eifano la ningwa kepangelo opo keshe oshiputudilo shepangelo shi deule ovahongwa momaifano a yooloka.
“Epangelo ola ti natu yandje oilonga yopokafimbo kovalihongi opo va mone owino mwaasho taveli hongele eshi otashi va kwafa opo va kale vena ounongo wa wana ouna tava ka konga oilonga.
Nena elelo lodoolopa yaNdangwa otali wanifa po eshi epangelo la pula,” Namgongo ta ti.
“Ondangwa Cosdec oya kwatelwa moiputudilo omuwoi oyo ina ovalihongi taveli longele oilonga yokomake moitukulwa ihetatu moshilongo. Otuna ovalihongi 1 512 va teelela omadeulo moshilongo novalihongi 274 ova dja koshiputudilo shoCosdec mOndangwa.
Oshiputudilo shomOndangwa osho yo shina ovalihongi vahapu ovo va pumbwa omadewo moshilongo,” Namgongo ta ti.
-wakudumoauleria@gmail.com