Uuna ominino dhomeya dha topa, ihe inadhi longwa mbala, ohashi hepitha omeya niifuta yomeya ohayi londo noonkondo, onkene oshigwana otashi kumagidhwa shi kale tashi lopota iiningwanima mbyoka mbala. 

Omunashipundi melelo lyondoolopa lyOshakati Hofni Mutota okwa ti, kehe ngoka ta ka tsakaneka ominino dha topa na lopotele oombelewa dhawo. 

Natango okwa ndhindhilikwa omeya haga hepa uuna aafuthi ya yaka po oometa dhomeya. 

“Uuna ominino dha topa odha pumbwa okulopotwa opo dhi longwe meendelelo,” ta kumagidha ngaaka. 

Ta ti, ominino odha pumbwa okulopotwa uuna dha yonuka, opo omeya kaaga hepe. 

Olundji ominino ndhoka dha enda moondjila, ohadhi vulu okutopa, ndele omeya taga hepa. 

Malakia Ashivudhi gwomolukanda Uupindi, muuninginino wOshakati okwa ti okwa loloka okwaadha omunino gwe gwa tetwa kuwalye, nomeya ngoka ohaga tondokele mokandombe komeya ke li pooha. 

“Otandi fekele aanamukunda yopopepi nOshkati mboka haya nwetha iimuna yawo mokandombe moka. Nonando ndi ya pule kutya olye a teta opayipi yandje, ohaya ti kaye shiwo,” ta nyenyeta ngaaka. 

Mayola gwondoolopa yaShakati Leonard Hango naye okwa li a kumagidha wo oshigwana shi hulithe po okuteta po omiti. 

Hango okwa kumagidha oshigwana ta ti, nashi kale oshinakugwanithwa sha kehe gumwe okutsika omiti. 

Ta ti, omiti ohadhi dhana onkandangala momikalo dha yooloka, nodha simana wo monkalamwenyo yomuntu kehe. 

“Omiti ohadhi opaleke oondoolopa, ohadhi gandja ombepo nohadhi koleke uundjolowele welelo lyondoolopa uuna sha tsakaneke ominino dhomeya dha topa moondjila nenge kehe pamwe mondoolopa, opo dhi longwe meehendelelo. 

Kehe ngoka ta ka tsakaneka ayihe ya zi nokutumbulwa, na lopote konomola yopeke, konomola 0812947119. 

“Otatu kumagidha wo natango ooyene yiimuna hayi kala mokati kondoolopa opo ya kale taya kongolola iimuna yawo, kaayi ye mokati kaantu,” ta indile ngaaka. 

Ta ti, iimuna otayi vulu okweeta iiponga uuna tayi taaguluka komeho giihauto. Ta gwedha po kutya ihayi ulike ethano ewanawa mondoolopa, ondoolopa oyi na okukala ya wapala noya yela. 

“Uuyogoki owa simana onkene oshigwana oshi na okukala tashi opaleke omalukalwa gasho osho wo omidhingoloko dhasho opo ku yandwe omikithi tadhi vulu okupitila moongaga,” ta popi ngaaka. Ta kumagidha oshigwana shaShakati kutya nashi kale sha tula uuyogoki komeho. 

“Onda inekela kutya kehe gumwe okwa hala ondoloopa ndjika yi hume komeho, pamukalo gwomayakulo ga yooloka, ihe shoka otashi ningwa ashike uuna ondoolopa ya yela, oshoka kape na ngoka ta hala okweeta ehumokomeho mehala lya gagala,” ta ti ngaaka. 

Ta ti, uuyogoki otawu kala po ashike uuna kehe gumwe te wu simaneke noku wu tula miilonga. 

“Ondoolopa otayi kala ombwaanawa uuna ya yela, onkene otandi, tsikile okukumagidha oshigwana shaShakati shi kaleke po uuyogoki,” ta popi ngaaka. 

-vkaapanda@nepc.com.na