Charles Ndeuman
Ehanga lyaNamibia lyomaloli olya kanitha oshimaliwa shoomiliyona N$4 sho yimwe yomoololi dhalyo dhoondongelwa anuwa lya fikwa po kaakwashigwana yaMozambique methimbo lyiikolokosha yopapolitika mbyoka yi li moshilongo shoka.
Omukuluntu gwehangano lyoNel Snel, Beni Steyn okwa ti eloli olya li ta li fala oohi oontalala koshilandopangelo shaMozambique Maputo uunambo sho lya katekwa kegungo lyaantu ya homata. Anuwa tango aantu oya yugu mo oohi ndhoka dha li moshikoto shololi nokonima oye li hwameke omulilo, eta li pipo thilu.
“Eeno osho sha ningwa po shoka, ololi yetu oya li tayi fala oohi koMaputo sho ya kuthwa oondongelwa ndele eta yi fikwa po. Otwa kanitha oshimaliwa shoomiliyo N$4 oshoka omutse gwololi kumwe noshikoto oyi na oomiliyona N$3 omanga oondongelwa ndhoka dha li mo odhi na ongushu yoomiliyona N$1,” osho Steyn a ti.
Steyn okwa ti omuhingi gwololi ndjoka sigo oompaka okwa patekena moMozambique noonkambadhala dhoku mu galulila kegumbo koNamibia odhili metifa, ashike ehangano ota li pandula oshoka ina ehamekwa nande okashona.
Oolopota koshilongo hoka otadhi ti Mozambique okwa taalela omaipumomumwe pokati kaakwashigwana nepangelo molwa iizemo yomahogololo gopaupresidente mbyoka aahololi madhiladhilo ta ya ti kayi li pauyuuki.
Omangungo gaantu oge li momapandaanda ta ya holola omadhiladhilo ya hala iizemo yomahogololo yi shune mo. Epangelo lyaMozambique olya kambadha oku hulitha po omahogololomadhiladhilo ngoka moku ningila aantu omatilitho ashike shoka ina shi kwatha sha, noponkatu mpaka ota li ningi omatilitho goku tuma aakwaita yetanga lyegameno moshigwana opo anuwa ya ka hulithe po omakuyunguto ngoka.
Shi ikolelela kiikundaneki, sigo oompaka omakuyunguto ngoka oga faalela oomwenyo dhaakwashigwana yaMozambique li 18 noka pu na endhidhiliko lyeshunopevi miikolokosha mbyoka.