OSHAKATI – Omahodhi noondingolo ogali taga tondoka nokuuvika mokapale kemanguluko kOshakati sho aavali ya holola enyanyu lyaanona yawo sho ya kutwa metanga lyopolisi.

Monica Manzila okwa ti, nonando onkalo ya kala yaali nawa oshoka kee na iiyemo ya sha, omagalikano oga kala noku mu palutha sigo omwana Isaak Manzila gomimvo 20 a taambwa metango lyopolisi.

“Kape na shikukutu shaahulu, onda kala noku tekula okanona kandje, momukalo ngoka ta vulu okukala omuvuliki sikulimwe, ye a ka vule etusile wo oshimpwiyu, nonando twa kala twa taalela onkalo kaayishi kwiindhindhimikilwa,” ta popi ye ta pititha mo omahodhi. 

Ta ligola ye ta tanga Pamba ta ti, omayamukulo ge osho guuvika, nena omumati gwe oye nguka a zala iikutu yuupolisi.

“Onda hala wo u tsikile nombepo wa kala nayo mumati gwandje, e to longele oshilongo shika noku gwanitha po oompango adhihe ngaashi naana wa dhewulwa,’’ ta kumagindha omwana ngaaka.

Isaak okwa ti, ota i pandula ye mwene sho a piti omadheulo sigo ta gana.

“Otandi ka longa nuudhiginini, noku gwanitha po ayihe twa kumagindhwa nayo oshowo okulonga sha ikwatelela koompango dhoshilongo shika,” ta popi ngaaka.

Ta ti, omahodhi ga meme inaga ya pevi, ngaashingeyi okwa mono omukwathi.

John Tobias, omupolisi omupe esiku ndyoka okwa ti sho ta tameke iilonga ye iipe yuupolisi otaka longa nuudhiginini opo a shonopalithe oshowo a hulithepo iimbuluma.

“Ngaashi sha popiwa nena komupresidente Netumbo Nandi-Ndaitwah  kutya okukutwa miilongo yuupolisi kashi shi ashike ekandulepo lyokwana iilonga, ihe okugamena oshilongo noku kaleka po ombili,” ta popi ngaaka.

Ta ti, iilonga ye oyo tayi ya tango ku ayihe. 

Maria Amupolo okwa ti, oku kala omupolisi osha kala eyithano lye.

“Okuza mosikola onda kala nda hala okuninga omupolisi, nonando aakuluntu yandje ya kala yeli ompinge nasho, nena ongaye nguka,” ta popi ye ta imemeha mo.

Amupolo okwa ti, sho ta tameke iilonga ye itaka thiga nando emanya limwe lya londa ke kwawo.

vkaapanda@nepc.com.na