Charles Ndeumane
Konima yoomvula odhindji kaayi na oongulu dhokulongela aansaikola, osikola yaNalulago Combined School moshikandjohogololo shaNaiipa moshitopolwa shaShikoto osho ya mono omayambidhidho goongulu okuza kepangelo lyaJapan konima shoya li ya ningi eindilo yi yambidhidhwe.
Osikola yaNalulago Combined Schoolo oya li ningi eindilo kepangelo lyaJapan oku pitila mombelewa yuukaleliposhilongo yalyo moNamibia opo li yi yambidhidhe noongulu oshoka oya ninga oomvula odhindji kaayina oongulu dha gwana. Epangelo lyaJapan olya yamukula omakemo nolya yambidhidha noshimaliwa shoomiliyona N$1.2 shoka sha tungu etungo lyoongulu dhili ne oshowo okandunda koku pungula omambo. Etungo ndyoka olya tamekele oku tungwa muApiili 2023 nolyapu muNovomba 2023. Nonande osikola oya tamekele oku longitha oongulu ndhoka shodhapu omumvo gwaziko, epatululu pambelewa opo lyaningwa mEtitano komukaleliposhilongo gwaJapan moNamibia Nishimaki Hiaso. Omukuluntusikola gwOnalulagao Combined School Wilka Katti okwa ti nkene a tamekele okulonga posikola mpoka momumvo 2015 onkalo osho eyi adha ngaaka. Oongulu ndhoka dha kalapo odha kulupa noonkondo dho kadhali dha gwanena aanasikola ayehe.
“Otwali tungapo oongulu dhiipeleki ashike pethimbo lyuupyu ihamu vulu oku longelwa aanasikola oshoka omwa pupyala noonkondo, onkene aanasikola ohayeya oku longelwa kohi yomiti,” Katti ta ti. Katti okwa ti ngashingeyi osikola yawo kayinawe ompumbwe yoongulu noyina etegelelo opo aanasikola oyendji yeyi wayimine
“Nonande osikola oyina oompumbwe nomashongo galwe, ompumbwe yetu yoongulu oya kandulwapo. Otwi inekela kutya paife ngaashi tuna oongulu dhili pamuthika gwopombanda dho oonene nawa ota tu mono aanasikola oyendji mosikola yetu,” a gwedhapo.
Kansela gwoshikandjohogololo shaNiipa Vilho Nuunyango okwa pandula epangelo lyaJapan molwa omayambidhidho ngoka tali gandja moNamibia, oshowo kepangelo lyaNamibia molwa omakwatathano omawanawa niilongo iikwawo ngoka lya kalekapo.
“Onga oshikandjohogololo otwa pandula unene molwa omayambidhidho ngaka. Otwa pandula unene kelongelo kumwe ewanawa ndyoka lyi lipokati kepangelo lyaNamibia nepangelo lyaJapan oshoka okanona Okanamibia ka longwa oshili muuwanawa woshilongo shetu,” Nuunyango ta ti. Nuunyango okwa ti ombili ndjoka yi li moshilongo shaNamibia oyo tayi hokitha notayi hili omapangelo giilongo yilwe ga gandje omayambidhidho moNamibia kaagena uupyakadhi washa.