Omupresidente Netumbo Nandi-Ndaitwah okwa ti epangelo ota li kwashipaleke kutya Omunamibia keshe okwa pewa ehongo lina ongushu ya kola okuyandja omadeulo nokuyambidida oiputudilo nomandiki opaungoba.
Edi Omupresidente okwe di popya onghela koshivilo shedjalo lomanguwo koshiputudilo yopombada shaUNAM moWindhoek.
Ovalihongi 4342 ova djala omanguwo koitayi moshilongo yoiputudilo yaUNAM momaifano a yooloka.
Natango, onghela oshiputudilo shaUNAM osha yandja odjapo yonghatu youndokotola yefimaneko kOmuprima mukulu Nahas Angula.
Angula okwa li yo Ominista yEhongo nokuli a dana onghandangala ya kula moshilongo okudja pefimbo loita fiyo Namibia a manguluka.
Nandi-Ndaitwah okwa ti komesho yeedula tadi ya, onghalonawa yoshilongo oi li momake ovanyasha onghee osha fimana ngeenge ovanyasha va mona ounongo wehongo, okudeulwa opo va dule okueta po omalunduluko mawa.
“Ovanyasha ovo ovaleli vokomongula. Ota va kala ovanashilonga momaifano a yooloka okutunga oshilongo shetu,” Omupresidentge ta ti.
Okwa pandula oshiputudilo shaUNAM eshi tashi twikile okuyandja ehongo li na ongushu ya kola nokuyandje ounongo kovanyasha.
“Ounongo owa fimana shaashi otau kwafele omunhu a kale e na eshiivo meifano olo elihongela. Ovanyasha koiputudilo ya yooloka nava twikile okupewa omadeulo,” ta ti.
Okwa ti okudja omudo 1992 eshi UNAM a topwa po, okwa eta po ovanyasha ve na ounongo novadeukika lela.
Omupresidente okwa ti UNAM okwa li ashike a tamaka tete lovalihongi 3 639 ashike paife oku na ovalihongi 308 36 naashi otashi ulike kutya UNAM okwa xuma komesho paife.
Okwa ti ovahongi vaUNAM nava twikile okuyandja omadeulo taa tu kumwe noikondo yoilonga ei ina omhumbwe wovanhu opo va dule okukalonga ko.
Nandi-Ndaitwah okwa yelifa ta ti ombelewa yaye onga Omupresidente moshilongo oya etela ovalihongi onghundana iwa okukala itava futu vali ofikola koiputudilo yopombada.
“Ovanafikola paife otava fikola osha li nokukala va pewa oshimaliwa shokulikwafela shoN$3 000 keshe komwedi,” ta holola ngaho.
Okwa ti e i oyo omhito iwa opo ovanyasha vaye koiputudilo ya yooloka va ka mone ounongo.
Omupresidente okwa ti oinima iwa aishe ei tai longwa melongelokumwe nongudu yoSwapo ngaashi naana kwa li va popya momanifesto wongudu pefimbo loshikonga shomahoolola shomudo 2024.
“Epangelo ola eta po eepoloyeka dihapu dovanyasha ngaashi okuyandja eemhito kovanyasha ve ke lideule keeministeli da yooloka osho yo komahangano enyama kepangelo,” ta ti.
Okwa ti yelifa ta ti elalakano opo ovanyasha va mone ounongo mwaasho velihongela.
“Omahangano anyama kepangelo naa kale taa yandje eemhito doilonga kovanyasha opo ve kelideule okumona ounongo,” ta ti.
Okwa lombwela ovanyasha va dja omanguwo opo vaha teke omukumo wokukonga oilonga.
“Onde mu pandula amushe eshi mwe shipondola okumana elihongo leni fiyo ta mu djala omanguwo. Omwa ninga nawa a mushe,” ta ti.
fhamalwa@nepc.com.na