Auleria Wakudumo

Omukulunhuwiliki mouministeli wounamapya nounaimuna, eeshi, omeva nomatalululo omadu Ndiyapuki Nghituwamata okwa holola kutya ouministeli waye otau ka wedela ko koproyeka younamapya i li momukunda Ekoka koushilo wOkongo moshitukulwa shaHangwena. 

Nghituwamata eshi okwe shi holola pefimbo a talela po onhele oyo i na ounene weehekta 140 opamwe novanambelwa va yooloka okuninga omapekapeko a wedwa po. 

“Ouministeli owa enda nosheendo shovanambelewa okudja koshikondo shounamapya naavo hava ningi omakonakono nomapekapeko edu nomeva. Ovanambelewa ove ya okuninga omapekaapeko edu namakwao a wedwa po oo taa dulu okulongifwa opo ku ningwe omatokolo she likwatelela kwaasho sha monika po,” Nghituwamata ta ti. 

Nghituwamata okwa weda po kutya otava ningi yoo omakonakono a wedwa po va tofe opo tapa dulu okutulwa eemboola domeva odo tadi ka kwafela okuandjaneka omeva moproyeka oyo naapa taa dulu okuxupwa. 

Okwa holola yo kutya oproyaka inai teelelwa ashike i yandje oipalufa koshiwana ashike otai ka yandja yo oilonga nokukwashilipaleka kutya ovakwashiwana vomomudingonoko ova mona ouwa uhapu ngaashi okumona oikulya osho yo oilonga. 

Ouministeli owa katuka onghatu ei she likolelela keifano lOmupresidente Netumbo Nandi-Ndaitwah eshi a pula oikondo yepangelo osho yo yopaumwene i longele kumwe okufinda ondjala moNamibia. 

Nghituwamata okwa ti ouministeli otau ka kala u na eeproyeka dounamapya moitukulwa aishe 14 yoshilongo opo va kwashilipaleke kutya keshe oshitukulwa otashi findi ondjala, okuyandja oilonga nokuyambulapo ovakwashiwana vopomudingonoko osho yo oikulya yoshilongo. Okwa holola kutya edu oli li koshi yelelo louministeli wounamapya nohali longifwa okukwafela ovakwashiwana vovayelele vopomudingonoko noipalwifa.  Nghituwamata okwa pula ovanambelewa ovo tava ningi omapekapeko opo va endelele opo oproyeka iha yiwe moshipala ile i kwate efimbo lile inai tamekwa. 

“Ohandi indile yo ovakalimo vomEkoka opo va longele kumwe mokuyandja ekwafo koproyeka ei shaashi otai va etele ouwa uhapu,” Nghituwamata ta ti ngaho. 

-wakudumoauleria@gmail.com