Ombelewa yomupilimaminista otai kwashilipaleke kutya ovanhu va ninga oihakanwa yefundja otava pewa omakwafo ngaashi oikulya nomeva. 

Oitukulwa ngaashi Oshana, Omusati, Kunene nOhangwena okwa lopotwa omapya nomaumbo e li koshi yomeva. 

Mexuliloshivike Omupedupilima Natangwe Ithete okwa talela po oikandjohoololo oyo ya dengwa kefundja monooli. 

Iithete okwa yandja oikulya ngaashi oukutu voufila, omaadi okulya noshivelelwa koshiwana shi li keetenda kEhenye mOshakati. 

Ithete ou e li yo minista woikwamina noikwanghono okwa ti okwa pandula komalongekido a ningwa koitukulwa okuyambidida oihakanwa yefundja. 

“Kape na omunhu ta dengwa kondjala keetenda ile ta file momeva. Otu na eetenda da wana okuandjaneka koshiwana,” ta ti. 

Onghela ngoloneya woshitukulwa shaMusati Erginus Endjala naye okwa yandja oikulya kovanhu ve li keetenda. 

Oikulya okwa li tai tutwa nedakadaka molwaashi eendjila odi li koshi yomeva. 

Ngoloneya okwati oshikandjohoololo shaGongo, Ruacana nOutapi oyo imwe ya kumwa kefundja. 

Okwa ti ombelewa yaye oya tula oinima aishe peenhele okukala ya yambidida oshiwana. 

Mayola wodoolopa yaShakati Leonard Hango, onghela okwa kumaida oshiwana opo shi kale tashi lopotele muni ngeenge omaumbo avo e li koshi yomeva. 

“Muni waShakati oku na onhele yedu ya wana okutululula ovanhu va ninga oihakanwa yomeva,” ta ti. 

-fhamalwa@nepc.com.na