Victoria Kaapanda
ONGWEDIVA-Aanengeshefa oyendji momatala gaHelao Nafidi moshitopolwa shaShikango oya dhengwa ondhimbo onene, sho oongeshefa dhawo dha indikwa okutsikila okulanditha.
Miriam Shihepo ngoka a ningi ethimbo ta landitha momatala okwa ti ke uvite oshinima shoka kashi mu uvitithe ombili, oshoka okwa li a ikolelela miipindi ye.
“Ondi na uunona wu li uhamano, awuhe wu li kohi yoomvula omugoyi mboka awuhe wa tala ashike koshipala shandje ngele tandi tula omboloto poshitaafula. Nena oshimaliwa otandi kutha peni ngele itandi nyangadhala?” Shihepo ta popi ngaaka.
Ta gwedha po ta ti ye ke na omuyambidhidhi megumbo lye onkene ayihe okomapepe ge. Ta nyenyeta ta ti elelo lyondolopa olya ninga epuko, kakwa li lyi na okupata omatala.
Shihepo okwa ti oya li ye na ashike okupewa omalongo nkene ye na okukeelela omukithi goCovid-19, oshowo nkene ye na okulonga niilandithomwa yawo.
Omunangeshefa mOshikango Sacky Shikwambi okwa ti epato lyomatala ngoka olya guma wo oongeshefa dhilwe mOshikango, oshoka oyendji mboka kwa li ka landa iilya, noonyama niikwawo oyindji komatala okwa li wo haya piti positola , nopiipangelo yopawumwene oshowo puundingosho yo taya sapota naashoka ye na.
“Kamu na we ongeshefa mOshikango, oongeshefa ndhoka dha thigwamo dha patuluka nadho itadhi vulu okulonga we nawa, oshoka omatala okwa li haga eta ookasitoma wo komahala omakwawo,” Shikwambi ta popi ngaaka.
Ta ti shoka kasha na nkene shi na ku ningwa, oshoka shi shi na oshilonga okukeelela omukithi ngoka tagu popiwa.
Mayola gwondoolopa yaHelao Nafidi Eliaser Nghipangelwa okwa ti sigo onena inaya tsakaneka omanyenyeto gaalandithi yomomatala, shoka tashi ulike euveko lyakwashigwana kombinga yoCovid-19.
Okwa kumagidha kehe ngoka ta vulu okulandithila pegumbo lye, e shi ninge, ihe ina etha aantu ya ninge oyendji pehala mpoka.
Omalelo goondolopa dhaShakati naNgwediva oga tokola opo omatala gawo kaga pate manga oshoka oya gandja omalongo nkene ye na okukelela omukithi goCovid-19, oshowo ya kalelekepo uuyogoki.
Mayola gwondoolopa yaShakati Angelius Iyambo okwa ti oya li ya indike ashike aalandithi mboka kwa li haya landithile komeho gomatala oshoka okwa li haya kala mengathithi olindji.
“Oyendji ohaya zi koshishiindalongo Angola, oshinima shoka sha indikwa kutya moshilongo inamu pitikwa aantu taya zi kondje yoshilongo,” Iyambo a popi ngaaka.