Epuikiro ra yarura ehundju romautiro womaunguriro wakumwe momeva, Onongo Itah Kandjii-Murangi, ma tja.
Na zeri kutja omazemburukiro yevari pekepeke yozombura esere worutjindo rwa Puikiro ngari ko omayuva womasuviro omakongorerasane ovature va Pukiro ve notjiṋa tji ve rihongo muwo. Kandjii-Murangi, wina nguri Oministera yOmahongero wOkombanda, Ounongo Wakandinondi nOviwondekwa, wari omuhungire weyuva pomazemburukiro wOrutjindo rwa Pukiro mOmaueuozonjanda Oroviungura.
Omayuva womasuviro wokomurungu waingo Ovambanderu va karere nomazemburukiro wawo oveni okuza nokurinanununa mu inga ngari aya tyerwa ovature avehe va Pukiro.
Ndoovazu ovature va Pukiro ve notjiṋa tji ve rihongo po movitjitwa aviyevari pekepeke, owo nambano otjovature avehe pamwe va Puikiro, vasere okuuta okutunga ondopa yombwaneno nombwiro yOkarukondwa. “Ozombura esere nḓu matu nyandere mape ya arire otjikando tjimwe uriri mominyo vyetu ovengi. Posi ya ombura ndji mai yende pe nomazemburukiro wozombura 101. Otji me toko ovanane va Pukiro avehe kosaneno yavo, kutja ve ritoke oveni nokupambaha kokutja pamwe mave yeta tjike komazemburukiro wozombura o-101 za Puikiro.”
Ma tja otjozondekurona zaimba mba huka ominyo kOtjiṱiro Otjindjandja, ke nongeyakeyero kutja va pwirire ovisuta okuza kohoromende yEhi rOvandoitji, oyo nai ndji kara notjihungiriro ku na indji oya Namibia ohunga notjisuta. Posi ya pe nozosaneno zovisuta pekepeke.
Nu tjimwe tjaimbi ohapo tji tji ha pewa onḓengu, ombazu novirumatwa mbiri oviṱiziwa novitjeverwa i yomauhonapare wozombazu. “Ngunda ape ri nao ami ngunda hi ya rora okumuna omauhonapre wetu wombazu novanane vawo amave ungurisa ombazu otjotjisuta,” Kandjii-Murangi ma tja. Ne tjesa momake wovanane vombazu.
Ma tja wa tjivisirwe kutja Otjirata tjOvirumatwa Vyotjiwaṋa tjari mEpukiro katjisupi okuzuva kutja ongwaye Orumbo rOzombanḓe za Tjimana tji rwa sere okuririsiwa otjirumatwa tjotjiwaṋa. “Okupuratena, okurihonga nokuresa ekuruhungi rounane wombara Nikanor Hoveka, tjinenenene mokutja ke yari omunane wonganda ya Tjimana uriri, posi ya wari omunane wovandu avehe, ihi hapo katjiṋa okurihungirira otjini kutja pe kare nao,” Kandjii-Murangi ma tja posi ya atja itji tja sewa kourizemburuka nondyero yOtjirata tjOvirumatwa Vyotjiwaṋa otjini.