ONGWEDIVA – Aanona monooli nuumvo otaya ka dhana okili kuyele sho taya ka etelwa “065 Kiddies Festival”.
Omukokoli gwo065 Kiddies Festival Martha Niilonga okweya po nendhilandhilo lyokugongaleka aanona monooli sho teya etele ayihe taya pumbwa okunyanyukilwa pamwe omanga omasiku goKili inaaga thika.
Niilonga ta ti aanongononi oya nyola kutya okudhana kwaanona okuna mo sha muundjolowele womadhilandhilo gawo, onkene oshapumbiwa noshasimana uuna aanona taya nyanyukile pamwe.
Omayinyanyudho taga ithanwa “065 Kiddies Festival” taga ka ningwa okuza momasiku 29 sigo 30 Novomba nuumvo, otaga ka kala ogo gotango monooli.
Niilonga okwa ti, otaga ka ningilwa mehala tali ithanwa Mayoral Parks mOngwediva, okuza potundi 08h00 sigo kwatoko. “Aanona otayaka futa N$20 aakuluntu N$20 pomweelo omanga aanona taya lumbu nuulema taya ka pita oshali,” ta ti ngaaka. Ta po pi kutya omasiku ngoka gaali otaga ka kala guudha enyanyu oshoka otaga ka kala gena iinyangadhalwa ayihe ya wopalela aanona, iikulya iikunwa oongalo dhopashinanena niikwawo oyindji yiholike kaanona.
Niilonga ota hiya aavali ya fale aanona omasiku ngoka opo yaka nyanyukile pamwe. “Ondeya po nedhiladhilo ndika oshoka onda ndhindhilike kutya aanona oya kolota ohole pamwe naakuluntu yawo, olundji aakuluntu ohaya yi nookuume kawo taya thigi po aanona, sho shoka nda longekidha omasiku ngoka aakuluntu yaka uuvithe aanona yawo ohole,” ta fatulula ngaaka.
Ta gwedha po kutya shoka hashi gandja oompito dhafa ndhoka o ngaashi omauliko giipindi ngoka haga holoka ashike iikando iishona, ihe ihaga gandja omahala ga andjuka nawa kaanona ya kale pamwe naavali yawo.
Niilonga okwa indile wo oshigwana, kwaa ngoka ta vulu esiku ndyoka etelele “uukwathithi waakiintu” nando kamwe ashike, iikutu noongaku oonkulu oshowo kehe shoka shili po, opo yika gandjwe kwaamboka yeli mompumbwe. “Oshoka onda itaala mokushuna moshigwana, shoka tandi ka mona po otandi ka kwathela osikola yina uunona yena uulema,” ta uvake ngaaka.
Okwa ti, omasiku ngoka hago goku kala inaaga longithwa unene kaanona, omanga taya adhika yeli mefudho lyosikola. – vkaapanda@nepc.com.na