MBUNYA-Aalongwa oyendji posikola Mbunya Combined moshitopolwa shaKavango West oha ya pewa ashike omukumo goku kala mosikola ketete ndyoka hali telekwa noku gandjwa kaalongwa ayehe.

Epangelo olina opologalama yoku topolela oosikola unene dhokuushayi uusila wetete.  Olopota yuuministili welongo oya holola kutya okuza nkene ya tamekele oya nkondopaleke eyitule mo lyaanona mosikola nosho wo okushunitha pevi omafawulo.

Omukuluntusikola posikola Mbunya Combined Wellem Kotokeni okwa ti aalongwa oyendji posikola yawo oha ya zi komagumbo kaakuna iiyemo yili nawa, onkene oya ikolela ashike metete ndyoka hali topolwa pethimbo lyokafundho.

Ta ti, osikola yawo oyina aalongwa ye vule 1200 okuza koshikunino sigo ondondo yimwe, ihe ayehe oha ya pewa okatete oshoka oonkalo komagumbo odha faathana, ka dhili nawa. “Yamwe ngele yali posikola etete, kaye na we shoka ta ya kalya oshoka komagumbo ka kuna shoka taya adha ko, sho osho shoka oyendji oyeli mosikola oshoka oya hala okulya,” ta fatulula ngaaka.

Omukuluntusikola okwa ti, ngele oya kala yaana okatete nando, oshiwike shimwe omolwa omayimbo hageya po ombaadhilila, naalongwa oha ya tameke taya shonopala oku ya kosikola.

Ta fatulula kutya, oya ndhindhilike kutya ngele etete ndyoka olya kala kaali po sigo aluhe, nena oyendji ota ya ka thiga po oosikola. Omulongi posikola Mbunya Combined Kafuro Martins okwa ti nonando aanona haya topolelwa etete, oya taalela wo omashongo oshoka kaye na mpoka haya lile , ohaya lile ashike momavi.

“Onkalo yoku lila kehe mpoka ka yili nawa, oshoka oongaga osho wo iiyagaya ota yi vulu okuya muuyaha waalongwa omanga taya li,” ta popi ngaaka.

Okwa indile moshigwana osho wo komahangano omanene opo ya yambindhidhwe okutungilwa ehala lyokulila aanona osho wo ndyoka hali telekelwa.

Ta ti, unene ethimbo lyomvula oha ya kala ya taalela onkalo odhigu.

Omulongi gumwe natango posikola mpoka Abrahama Kalyata okwa ti, osikola natango oya taalela wo uupyakadhi womatungo, aalongwa oyeli moongundu ya pitilila yeli mo 60 shoka hashi ya longitha nuudhigu.

“Iha tu vulu we okugandja ethimbo lyongushu komulongwa kehe oshoka aalongwa oyendji mongulu,” ta popi ngaaka.

Omulongwa gumwe okwa popi kutya oya pumbwa wo omahala gokuza posikola oshoka ohaya ende iinano iile unene shoka hashi ya shololitha thimbo limwe okuthika kosikola.

Uuministeli welongo, uungoba, aanyasha, omaudhano, oonkulungu nosho wo oonkuluhedhi owa lopota kutya epangelo oha li longitha oomiliona dha thika N$867 omumvo kehe okupalutha aalongwa yeli momihandjo dhosikola dhepangelo. 

–vkaapanda@nepc.com.na