Auleria Wakudumo 

Minista womidingonoko, eefuka nomapashiyono, Indileni Daniel okwa yandja omaloli avali koshikunino shoinamwenyo Etosha National Park. 

Eloli limwe otali ka kwafela okulonga eepate, okunana odalate yoshikunino oshoyo okupashiona nosheendo shokukondjifa edipao loifitukuti ya amenwa, nokukwafela oilonga imwe ya wedwa po. 

Daniel okwa yandja eloli loMercedes-Benz 33 Series Dropside oshoyo likwao loPowerstar Chassis Cab Water Tank. 

Omaloli okwa kosha ongushu yoshimaliwa shi fike peemiliona N$7 130 717. 

“Omaloli aa otaa ka longifwa yo moilonga ya wedwa po ngaashi okututila omeva kovanambelewa vokupatolola moshikunino shoinamwenyo, okulongifwa mokulonga odalate, eepata, okudima omudilo wonhumba tau ka holoka. 

Omaloli aa otaa ka kwafela okukaleka po oshikunino shoinamwenyo,” Daniel ta ti. 

Daniel okwa weda po kutya apa tashi dulika omaloli aa otaa ka tuminwa yo okukwafela oilonga ya faafana koikunino yoinamwenyo ikwao. 

Minista okwa indila ovanambelewa vomoshikunino shoinamwenyo mEtosha opo va kwashilipaleke kutya omaloli oo okwa longifwa ngaashi sha ufwa. 

“Atushe otuna okwashilipaleka kutya omaloli okwa longifwa noukeka notaa kwatelwa po okuamena nokukaleka po Etosha,” Minista ta ti. 

-wakudumoauleria@gmail.com