Ouministeli wouhaku otau kwashipaleke kutya ovanhu ovo va tembudilwa keetenda ova pewa omayakulo opaunamiti nosho yo eenete deemwe.
Omukulunhuwiliki wouhaku koshitukulwa shaHangwena, Robert Nandjila okwa ti ombelewa yaye oya tuma ovanailonga voundjolowele opo va ka hakule ovanhu ovo tava vele ve li keetenda.
Nandjila okwa ti ovanhu vamwe ovo ve li komaumbo ndele okwa kondekwa komeva ohaku tumwa edakadaka opo ovanhu va dule okupangwa. Okwa weda po ta ti edakadaka ohali twalwa natango oikulya koshiwana.
Ovanhu ve dulife 900 va dja momaumbo 176 ohava di keetenda moshitukulwa shaHangwena.
Ovanhu ova pewa omayakulo ngaashi oikulya, omeva, noundjuo ponhele opo hava di.
Otava ka shuna komaumbo ngeenge onghalo yomeva oya ti po xwepo. Eefikola dimwepo oda pata monooli opo ku kelelwe ovanafikola vaha fye omeva.
Omulukunhuwiliki wouhaku moshitukulwa shaMusati Alfons Amoomo okwa ti okwa talela po ovanhu hava di keetenda opo a didilike omayakulo ouhaku a pumbiwa koshiwana.
“Onda tameka nale okuyandjaneka ovapangi hava i keetenda okupanga oshiwana. Oshi li oshinakuwanifa shetu opo oshiwana shi li keetenda shi pewe omayakulo ouhaku,” ta ti.
Okwa kumaida oshiwana opo shi kale alushe tashi lopota pefimbo oshidu shamalaria.