ONGWEDIVA- Oshikunino shEtunda Irrigation Scheme neudo osha dula ko eenghaku, eshi sha likola epungu tali etifa eenghono.
Eshi osha nongwa pefimbo oshilongo sha taalela oshikukuta, nepungu olo otali ka ya momalandifilo opo li landwe koshiwana.
Omukulunhuwiliki woshikunino Etunda Sackey Shilyomunhu okwa ti otava lalakanene okulwifa ondjala noluhepo tashi pitile mokulonga oikunomwa ya yooloka.
Okwa ti Etunda ola longa oshilonga shipandulifa nota shi hafifa molwashi ovanafaalama ovo ve na omapya mEtunda ova longa noudinini okuteya epungu lihapu. Etunda Oshikunino shepangelo shi li koshikandjohoololo shaRucana moshitukulwa shaMusati.
Oshikunino eshi osho shimwe sha kula monooli noku na ovanafaalama va yooloka tava longo oikunomwa ya yooloka.
Shilyomunhu okwa ti neudo ova li lima ounene weehekita 180 ashike ove shipondola okuteya epungu moshipapumbu sheehekita 120.
Okwa weda ko ta ti eehekita 60 depungu otadi ka tewa konima yefimbo.
Okwa hokolola ta ti epungu ola tulwa nale meeshako nota li ka landifwa koitukulwa ya yooloka.
“Efiku keshe ohatu ya kula ovanangeshefa momwaalu munene tava pula okulanda epungu. Naashi otashi ulike kutya ovanhu ove na ohokwe nepungu letu,” ta ti.
Shilyomunhu okwa ti ove li pyakidila yoo noku kuna oilyavala moshipambu sheehekita 210.
“Oilyavala otai ka teya neudo meemwedi ngaashi Okotoba ile Novemba,” ta ti.
Okwa ti okwa pandula epangelo eshi ta li twikile nokuyambidida oshikunino shEtunda.
“Otwa pewa eshina lipe loku helela kouministeli wetu opo tu dule okulonga noupu,” ta ti.
Kansela woshikandjohoololo shaRuacana noku li omunashipundi welelowiliki loshitukulwa shaMusati, Andreas Shintama okwa ti Etunda ola fimana moshitukulwa shavo shaashi oha li yambidida ovanhu vahapu.
“Ovanyasha va dja momudingonoko wEtunda owa mona mauwa eemhito doilonga mEtunda,” ta ti.
Okwa ti Etunda ola kwafela ovanangeshefa va shona moku mona epungu lokukalandifa la wana.
Shintama okwa kumaida oshiwana opo shi twikile okulonga noudinini okum kaleka po Etunda.
“Ovanhu nava tote po oikunino younamapya. Oinyangadalwa younamapya oya fimana molwashi otai lwifa ondjala noluhepo,” ta ti.