OSHAKATI – Omukulunhuwiliki woshipangelo shaShakati Dr Ruben Kanime okwa ti moshipangelo ota mu tungwa etungo lipe loICU molwashi ova taalela eshongo lokuhe na onhele ya wanena ovanaudu. 

Okwa ti epangelo otali shi endifa nawa okuandjaneka omayakulo opaunamiti koshipangelo shaShakati oshoyo okulanda oilongifo nokukuta eendokotola. 

OICU onhele oyo hai kala ovanaudu ve li monghalo idjuu hava kala ve li komashina oifudifo nometonatelo lakwata moiti. 

Osaala oya tengenekwa okukala ya patuluka kexulilo lomudo ou. 

Kanime okwa yelifa ta ti osaala yoICU ei hai longifwa oya kulupa yo kai na eenduda dovanadu dawana. “OICU oyo ili po oi na ashike eembete hamano. Otwa taalela eshongo linene shaashi efimbo limwe ovanaudu ohava kala vahapu va pumbwa okupangwa koICU,” ta ti. Kanime okwa ti oshipangelo shaShakati ohashi yandje omayakulo ouhaku kovanhu tava di koitukulwa ngaashi Ohangwena, Oshikoto, Omusati oshoyo Kunene. 

“Efiku keshe ohatu tuminwa ovanaudu ve li momwaalu muhapu tava di koipangelo ya yooloka,” ta ti. Okwa yelifa ta ti oshipangelo shaShakati osha tungwa momudo 1966 sho osho natango oshipangelo shakula monooli. 

Okwa ti ngeenge tashiya kovapangi neendokotola oda wana okuyakula oshiwana molwashi neudo koshipangelo ova kuta eendokotola 40 novapangi 85. 

Kanime okwa ti koshipangelo kaShakati neudo okwa patululwa endiki lipe lomesho ta li yandje omayakulo opaunamiti nolatulwa omashina oshinanena. 

Okwa ti natango ove li pyakidila okukala va longula osaala yokutandela ovanhu molwashi oishona paife. “Oshi li eshongo linene shaashi eendokotola mosaala itadi wanamo ngeenge tadi tande ovanhu,” ta ti. 

Kanime okwa ti ovataalela eshongo loilongifo ngaashi omashinena oshinanena inaa wana ashike ouministeli owe li pyakidila nokukandulapo omukundu ou. 

Okwa ti natango oshipangelo osha taalela linene kosaala yovanhu ve na oupyakadi wopamadilaadilo ihe na onhele ya wana okutambulila ovanaudu vopamadilaadilo. 

fhamalwa@nepc.com.na