Lissony Njembo

Ministeris !hū-omkhâis dis ge khoese audogu hîa N$ 10 miljuns ǁ­khāsiba ǀhaob ai ūhâga, ǂoa ge wekheb di Wunstaxtsēs ai Europab ǀHûs (EU-Namibia) di marisihuib !nâ-ū, Ûitsamaxūn ǀkha ǂKhâ!nâs  Proxrami !aroma ge !khō!oa.

Nē audogu ge ǁkhaisa Land Cruiserga !khōǂgā hâ, ǀgamkha ǁîga xu !narima rase ra ûitsamaxūn ǂurusib !oabade mā klinikra ase a dawa!khunisa tsîb ǀguiba a kai autose. Nē auton ge ǀkhaebahe !aromadi ge ûitsamaxūn ǂurusiba ǁawoǁawos, Am tsî ǁKhora ǁōs khoraǂuisensa ǀoroǀoros, ǁgan-e sîǂuis ǂgaoǀkhādi ai ǂâuǀoasasib !nâ dīǀoaǀoas hâna. !Nakaǂnôa ministers !hū-omkhâis dis, Ruthy Masakes ge nē ǀkhaeba Namibiab ǂhanub di ǀons !nâ ge !khō!oa.

ǁÎs ge ǁnā soab ai ǁawosasiba mā tsî ge mî, nē auton nî !uru ǂâibasens !aroma sîsenūhe tsî ǁkhāti !gâi !ûi!gâs tsî mûams !naka nî ūǀgarahe !khaisa. “Sida khoen hîa ûitsamaxūn ǀkhae!khōdi !nâ a !ân di sîsenǀgauga ǀgaiǀgais !nâ di ge nē autode kai !âsa nî ǀhuru, aiǁgause !haese mâ ǀaeb a !khaisa ǂanǂuis, !haese oe-am tsî ǂhâbasa huiba ǂgari-aona mās khami. Nē ǀkhaeb ge a  !oahâǁguiri ûitsamaxūn ǂurusib, ǂâuhâ ǂûn nî hâsa ǁawoǁawos tsî !gâi hōǂgāde ǁnā ǀhûhâsigu ǀApas !âgu digu !aroma,” tis ge ge mî. ǁKhā ǁaxasib tawab ge !Hū!nāsi ǀAweǁguigu !Nans di direkter xenerali, Kaire Mbuendeba ge mî, nēs ge a ­gauǁgau mâtib omkhâisens ǂnamipe ra hâ sîsenǁareba nēti a mûmûsa !nuriga ra sī!nâ !khaisa. EUs !Hūǂnûǁ­khaeba-aos, Ana Beatriz Martins tsîn ge ǁ­îs ǀkhāba xu ge mî, nē ǀkhaeb Namibiab ǀAwas ǀHûhâsigu !Âgu (NCA) di ǂgari-aona ǂkhâ!nâ tsî ǀgaiǀgais tsîn tsîna !khōǂgā hâsa, ǁîn nî ǁāǁāhe tsî gomaǁgan-e sîǂuis ǂgaoǀkhāde dīǀoaǀoas ai. Hāǀaro rases ge EUsa Namibiab ǂhanub ǀkha ǀhao hâse Etundas ûitsamaxūn ǂû!khaib, Opuwos di ǂā!khaib tsî Omutambo Uomaue Quarantine !oabadi !khaib tsîna ǂgaoǀkhāsa !harodi kōse nî omkhâi.