Mulisa Simiyasa

OTJIWARONGOS – ǂUrusib ministers, Dr Esperance Luvindaos ge 15 000 ǀasa ǀgaub !nâ hâ sîsensarana, ǂhanub ǀaeǁgâugu ts ǀae!khō!khaigu di ǀaedī-aon tsî ǀae!khō-aon !hūb a ǂhabase hân !aroma ge ǁkhaeǁnâ. 

ǂOa ge wekheb di tsoatsoas !nâs ge minister Luvindaosa, Otjiwarongos ǂHanub ǀAeǁgâub tawa ge aiǂhomisa i ǁaxasib tawa ǂhanusi tsî !nae!khaixa!nâse nē sîsensarana ge ǁkhaeǁnâ. “Nē ǁaxasib ge ministeris ra ǁîs di ganganxasib tsî ǁguiǂgāsens tsîna ǁgauǂui ǀgauba, ǀae!khōs sîsenna hâb ge i tsî ǂansab ge i !haros !oa oahā-ūs diba. ǁKhāti khoesis, ǀunigats ūhâ ǁkhāsib ǀkha ǀae!khōsa mās tsî ǂnīsasiba ǂurusib â oaǀkhī-ūs !aroma,” tis ge Luvindaosa ge mî. 

Ministers ge mîsa !oas ge nē sîsensaran di ǁamaǂgansa ǀnai ǂoa ge kurib di ǀKhūǁkhâb !nâ ge tsoatsoa, ǁnāpas ge August 26 Xūkurus ǂNûiǂgāsa a ǁhûihe nē saranas nî N$56 miljuns ǁkhāsib ai ǂomse hîa. Ai!âs ge îsa gere mîs ge, ǀuni ge i !nās ǂhanuba xun ge ǀaedī-aon tsî ae!khō-aon tsîna sîsensarana !khō!oa hâ is ge 2014 ǁî kurib !nâ hâ isa. 

Ministers ge ǁgui!ā tsî ge mî, saran di ǀûgu noxopa ǁnāti a !khōǀgarasa khaisa, ǀaedī-aona !uri jadi tsî ǀae!khō-aona !khaeǂhoa -I tsî 1uri ǀûb !nâ hâsa. 

ǁHaron ge hoan !aroma ǂnū ǀûb !nâ aoregu tsî tararedi !aroma ūǀgarasa. !Hūb a ǂhabase a sîsenxa ǂurusib mâisan di ǀons !nâs gere gangansa mā soab ais ge Selma Muhenyes, Otjiwarongos ǂHanub ǀAeǁgâub tawa ra sîsensa ge mî, ǂgaoba xu hâ gangansas ǂgaeǂguira ǂhanuba ra mā !khaisa, ǁîn di saran ǀae-aona tarin a !khais di !gāsasiba ra mā amaga. 

“Kai gangans nē ǀasa sîsensaran !aroma. Sida ge ǀaedī-ao tsî ǀae!khō-aose kai ǂnīsasib ǀkha nē sarana ana tsî ǀoasa tsî ǂâuǀoa hâ ǂurusib !oabadi hîa !hūb sab ai ǂnīsasiba ra ǁgaus ai !gao!gao hâse, ǀae-aona nî !oaba,” tis ge ge mî.