Victoria Kaapanda
ONGWEDIVA- Omaso goku ikutha omwenyo oga ihanena uuyuni awuhe, naantu 800 000 ohaya ikutha omwenyo omvula kehe shoka tashi ulike kutya kehe konima yoosekonde 40, omuntu gumwe ota kanitha omwenyo.
Ndhoka odha popiwa komukuluntu gwombelewa yaanuuvu womadhilaadhilo Johanna Haimene mEtine pomatala gaShakati, sho ya li taya dhimbulukwa esiku lyuuvu womadhilaadhilo muuyuni opamwe naakalimo yomOshakati.
Esiku ndyoka ohali dhimbulukiwa omvula kehe momasiku 10 gaKotomba.
“Omwaalu moNamibia gwokwiikutha omwenyo ogu li pombanda noonkondo, notagu ende gwa uka pombanda kehe esiku. Unene aanyasha yoomvula 15-29, mboka taya ikuthathana oomwenyo okupitila momalovu oshowo iingangamithi,” Haimene ta ti ngaaka.
Ta gwedha po ta ti omakwatho ohaga vulu okugandjwa kugumwe ngele a nyengwa komadhilaadhilo nenge ngele omadhilaadhilo ge mu thigi po sigo a mono kutya ye ke na we oshilonga kombanda yevi.
Ta ti kape na uudhigu ihawu kandulwa po ngele owa kongo omakwatho unene kaahungimwenyo ya dheulwa nawa.
Ta popi ta ti ethimbo limwe ope na oombepo ndhoka hadhi adha omuntu tadhi mu lombwele kutya na ka imangeleke nenge e wete aantu ya hala okumutsa nomagonga, ndhoka hadhi muthindile a ka ikuthe omwenyo.
Haimene okwa li a kumagidha oshigwana kutya inashi etha we omawupyakadhi ga thige po omadhidhilo gawo, naya kambadhala yathike piipangelo yopopepi opo ya mone ehungomwenyo lyomeendelelo.
“Ohapu kala omandhindhiliko haga popiwa omanga gumwe inaa ikutha omwenyo, ngaashi ta tameke ta popi ta ti; itandi yi komeho we, ngeno kakwa li nda valwa, inandi pumbwa sha we monkalamwenyo, aakuluntu yandje inaya pumbwa okwiipyakidhila nangame we, ngele nda kala kandi po we yamwe otaya pepelelwa oshowo kape na ngu e na nangame,” Haimene ta ti ngaaka.
Ta ti ope na wo mboka ihaya popi ihe oto dhimbulula omayinyengo gawo nenge oonkalo dhawo tadhi lunduluka, gumwe oha tameke ta ikalela, ano ma mwena itaa popi naantu, ta gandj po omaliko ge, okunwa omalovu unene oshowo ta tameke okushanga ondjokonona nokutopola kutya olye ta thigulula ngele siku limwe a ka hula ko.
Haimene ta ti omuntu ngele a adhika kombepo ndjoka , oshipu oku mu dhimbulula, ashike ngoka wu li popepi naye na konge ekwatho lyehungomwenyo, oshoka ota vulu okukumagidhwa e ta dhimbwa omawupyakadhi noku ga taamba ko ngaashi ge li.
Okwa li a popi ta ti natango opwa pumbwa omulandu gumwe gu na okulandulwa uuna gumwe a taalela omawupyakadhi gokwiikutha omwenyo.
Ta ti pamwe ehungomwenyo inali gwana, oshigwana otashi ende tashi pupo, gwo omwaalu gwAanamibia omushona nale.