!GOMENǁGAMS – !Gomenǁgams !Ā!khōmais ge ǀgaisa marisihuib, N$75 miljuns diba Ministeris Kai!ā tsî !Garo!ā Omkhâisens disa xu ge !khō!oa, îs Green Valley ti hâ ǁanǁguib, !nāsase Farm 37 ti ǀgui a ǂansaba ǂnuwi.
Nēsa xu ra !huises ge Dana Sîsenǂuira Mâisas, Victoria Kapendasa ǁîs !ereamsa tani hâ ministerisa ǀgūǀkhā tsî !ā!khōmais !Garo!ā 37 ǀkha ūhâ ǀaweǁguiga ge ǀgoragu. ǂOa ge wekheb di Denstaxtsēs aib ge ǁnaetisa ǀawemā!nans di ǂnûs tawa nē !gâi ǂhôasa gere ǂanǂan soab aib ge, !Gomenǁgams !ā!khōmai-aob, Trevino Forbesa ge mî, Kapendas ge ǂgansa !Hoaǂkhaib !nâ ministerisa !oa a dīsa. “Ministeris ge ǁnās khao!gâ 13 !Khaitsâb 2025 dis ainē marisa !Gomenǁgams !ā!khōmais ǁga ge mātare!kharu. Nē maris ge ǂhâǂhâsa omkhâisens tsî omde Farm 37 Extension Propper ai ǂnuwis tsî 1-5 kōse hâ Khoraǂuisendi ais tsîn !aroma nî sîsenūhe,” tib ge Forbesa ge mî.
ǁÎb gere mîsa !oas ge marisa 1 500 !hū!âde ǂgaoǀkhāsa !gao!gao !oabadi ǀkha aiǂhomis, omde ǂnuwis tsî nēs !nâ-ū mā-ams ose ra ǂnaumâihe om!nôana ǀoroǀoros, tsî ǂkhari-omn !aroma a ǂhâbasa xūna aiǂhomitoas tsîna ǁnā !âb omdi dib !aroma.
“Nē projeks !aromab ge mîǁguisa ǁaeba nî saohe hîa khoese ǁkhâgu, !Khaitsâb 2025 diba xu !Khanǀgôab 2026 dib !nâ nî dītoahesa ra ǂâi!nâǁguihese. Nē kurib di 12 Taraǁkhumuǁkhâb dis ais ge ǀawemā!nansa 60%gu di sîsenni di dītoahesa ra !âubasen,” tib ge !ā!khōmai-aoba ge mî. Nēsis kōsen ge 200 xa a !nāsa ǁanǂgāsabena !Garo!ās 37 ai ǁan hâ. Nē !Garo!ās hîa 7 kilometerga !Gomenǁgams !auga ǁgoes ge, 2016ǁî kurib !nâ ǁōǂoa ge ai!âkam Erongob ǀKharisi Mûǂamaob, Cleophas Mutjavikuab xa ge ǁgauǂuihe, ǁîs ores ase ǁnā !ās !nâ hâ ommās tsî !hū!âde ǂgaoǀkhāsa !gao!gao !oabadi ǀkha aiǂhomis dis ase nî īsa.
ǂÂibasens nē !garo!ās dis ge, khoen jardi !nâ ǂnaumâi hâ khoen, ǂam hōǂgāde ra hō khoen tsî ǁau!khōs ǂnûiǂgāde ra sîsenba khoen tsîna ǁnāǀî doe-ūsa, ǁîs 30 000 !hū!âde a tani ǁkhā amaga.
!Gomenǁgams di ommās ge ǁaupexa 50 000 khoen omdi ǀkha khaos ai hâ, nausas ai!gûsa !kharu ge kurigu !nâ marisi !nubusib tsî nau hâ ǁgoaǂuidi xa gere !hâumâihese.