KATIMA MULILOS- Zambezi ǀkharisi mûǂamaos, Dorothy Kabulas ge ǂâiǂhansensa ge gowaǂui, !hūǂgâ-amdi tawa ra hâ goma!narib ǂnamipe tsî Namibiab tsî ǁîb ǁanǁare!hūgu ai ǂgansa ge dī, in nē danasa ra !khāǂoa mâsiba ǀhûǁarebese !kham!oa. Kabulas ge mîsa !oan ge 2024/25ǁî marikurib !nâ 184 ûitsamaxūn !narib di !nae!khaide a !nurisa. Nēs ge 614 gomana !khōgā hâ, ǁkhāsib ân N$3 miljuns xa a !nāsase.
“Nē mâsib ge ǂgari-aon ûitsamaxūn ǀguina !aorosasib !nâ mâi tama hâ, xawe ǀkharib di sâuǁkhāsib ǁawosasib tsî ǀhûhâsib !gâise hâs tsîn ona ra tsâǀkhā,” tis ge ge mî. Nausan 299 goman hîa ǁkhāsib âna N$1 miljuns ai ra ǀnōhena ǂhanub tsî ǂhanu-aisib !nâ-ū a hō-oahe, xawen ge 336 ûitsamaxūn, ǁkhāsib N$2 miljuns xa a !nāsana noxopa hō-oahe tama hâ. Zambezib ge !hūǀgorade Zambiab tsî Botswanab ǀkha ra ǀgoragu, tsî nausab ǀkharisi aib ai !gâi sîsenǁareba gere koahe, xawes ge ǀkharisi mûǂamaosa ge ǂan!gâ, goma!narib ǀgaisa ǁgoaǂuise ai!gûgaru !khaisa.
“Sida ge ǂhanusise ǂâiǂhansens âda Zambiab ǂhanub ǀkha ge ǀgoragu,” tis ge Kabulasa mî tsî ǁgamǁaredi Zambiab di Western Province ǀkhan ge ūhâ idi, in nē !narib mâsiba gowaǀîs dis ǁga gere ǁnaeǁgau. “Sida !âubasens ge ǂkhîb tsî ǁawosasiba oahā-ūsa sida !garo!ā ǀhûhâsigu ǁaegu,” tis ge ge ǀaro. Zambezi ǀAwa!namn di mîgowaba-aob, Kisco Sitalib ge New Erab ǀkhab ge ūhâ I dî!nâǁgamǁares !nâ ge mî, ǂgui!nâxa dīǀgaunan ūhâ, mâtin !nariba ai!gûsa ǁkhauba tsî !ûi!gâsa nî ǀgaiǀgaisa.
Nē mâsib xa ra ǂâiǂhansen ǂgari-aon ge ra mî, ǀgâsib ra nē goma!nariba !aromasa. “ǀNî Namibiaǁîn ge Zambiaǁîn xa !gaehe hâ tsî ǀgui goma-i ai N$300 sa ra mātarehe. ǁÎn ǀkha sîsenǀhao tsîn ge Namibiaba xu gomana !nari tsî !hūǀgoras !nâ-ū Zambiab !nâ ra ǂgâ-ū. ǀNîn ge ǁkhawa !narisa gomana supu ǂganǀgaub ai ǁama tsî ǂkhari ǁganǁamaxū!khain tawa ra ǁamaxu. Aiǁgause-i ge goma-i hîa ga N$9 000 ai ǂhunumase ǁamaxuhe hâ-e, N$1 800 tsî N$2 500 ǁaegu hâ ǂganǀgaub ai ra ǁamaxuhe. Kabulab ge hoa ǀkhāga xu hâ sîsenǁareba gere ǂgan, nē ǁkhoaxa tama mâsiba ǀam kais !aroma.