ONGWEDIVA – Etalelopo lohamba opo ya i koshipundi shouhamba waUkwanyama Jeronimo Haleinge kombala ya tungwa mepya la li lohamba Haimbili Haufiku vati inali enda ngaashi sha li sha dilaadilwa.
Otaku hokololwa Haleinge a li a ya novayambididi vaye kombala oyo ya tungilwa ohamba oyo ya teelelwa i nangekwe mOukwanyama womoAngola nelalakano okutala eumbo laye lipe omo ngeno ta ka ya monakuiwa yopopepi.
“Vati ova ya ve na ngoo omakende avo neembelela davo opo ve ke lihafife, ashike manga tava ende momikala deumbo okwe li denga po nokungabuka. Vamwe ovo va li naye ova faduka po. Katu shi shi naanaa kutya oshike sha ningwa po ashike ovanhu vomosheendo shaye vati ova hauluka ombala ndele tava kufa eenghali pepata,” umwe womongudui li omhinge neyokoshipundi laHaleinge ta hokolola.
Haleinge vati konima yefimbo okwa ka tutumbwa mo mombala nokutwalwa koshipangelo.
“Vati okwa ti ombala ite i nangala vali, ota kala ngoo nee he uya a talele po,” omulanduli umwe waHaleinge i na hala okutumbulwa ta ti.
Tomas Shapwanale umwe womongudu oyo i li omhinge nehoololo laHaleinge okwa ti oshiningwanima osho naye okwe shi uda, ashike ina uda kutya mongaha Heleinge oku li monghalo i li ngahelipi.
Apolinariu Ingamushinda Nghotokepo, umwe womovayambididi vaHaleinge oo e li omupata mongeleka yaKatoolika noku li yoo omunongeki kuimwe yomoiputudilo yopombada moAngola okwa ti ye odo ine di uda. Ashike ye okwa hafa eshi Oukwanyama wa mona ohamba moAngola.
Ta ti enangeko laHaleinge otali yambula po Oukwanyama oo wa li tau shuna pedu ngeenge tashi uya keputuko.
Haleinge ina tambulwa ko kepata leehamba daUkwanyama mwa kwatelwa ohamba Martha Mwadinomho yaKristian Nelumbu, kepangelo lAngola nokuvamwe vomOvakwanyama ovo ve udite kutya ohamba oyo i na okuulikwa moAngola oMandume Lomboleni yaPetrus. Petrus oo a dja mepata leehamba otaku hokololwa e li omumwainamati waao a li nale oshilyo sheumbo lopashiwana moNamibia Kandidima Nehova.